Fendo huellos

Corona borealis

2011-08-20T00:41:00.006+02:00

De todas as constelacións, una d'as que más goyo me fan ye Corona borealis. Ye una constelación prou simpatica ya que as suyas estrelas forman una sonriseta y encara que ye chicota y que no brilla guaire, ye una d'ixas constelacions que siempre prebo de viyer. Ta viyer-la cal alufrar (de nueitz, prou que sí) ent'o Ueste, junto a la constelación de Bootex u l'estrela Arturo. EN o video que he penchau astí baixo la viyeretz como una C ao revés.

¿Hetz puesto viyer al Perseidas ista anyada?

¡Salut!

http://www.youtube.com/watch?v=E2pkIrEKFKM&feature=player_embedded

Contradanza de Cetina.

2011-05-19T18:50:00.003+02:00

Ista nueit, a nueit magica de totz os 19 de mayo, o cielo y l'infierno se ubren ta ninviar-nos a dos convidaus, protagonistas d'una historia recentada a a luz d'as hachas y a o ritmo d'a mosica, a luna y o diaple, que juntos nos ferán remeranza d'o que estión os nuestros debanpasaus y o que somos nusatros, Celtiberia.

Una nueit en a que en o lugar celtiber de Cetina rimane completament escuro, a la luz d'as hachas portadas por o sequito d'animas d'o diaple, os cuals realizarán una danza d'adoración a la luna.

Una nueit en a que os espritos d'a celtiberia de fan sentir mas que no nunca.

Diya d'a Tierra

2011-04-22T23:59:00.005+02:00

Goyoso diya d'a Tierra ta totz.

Tornando

2011-03-19T23:10:00.004+01:00

Dimpués de muitos meses d'hivernación, sin ganas d'escribir, he creyiu que caleva fer sinyals de vida. He estau bells meses con brenca ganas de fer cosa, os desamens, os trevallos, embolics y más embolics. Sincusatz-me os que gosatz de cabo ta qand fer una uelladeta a o mío blog, pero soi humano y por lo tanto imperfecto.

Istos días de buen orage, me fa asabelo goyo de nueitz de devantar l'ambiesta a l'atra metat, a la superior aon as estrelas son siempre uellando-nos encara que muitas vegadas as boiras no nos dixen comprobar-lo.

Ue a luna ye más graniza y más brillant que no pas mai. Junto a ista os dos míos astros preferius son Sirio, ixa estrela que brilla más que no pas atra y que dica meya nueit se dixa viyer ent'o sur y tamién as Pleyades, una colla de estreletas muit chicorronas pero que manimenos en juntar-se fan un collar de estrelas entre Orión y Tauro.

Viyer o firmamento me plena de paz y tranquilidat. Tos convido a que compartatz ista experiencia. Astí alto no bi ha problemas, no bi ha miedo a o esdevenir, ye tot un mar de tranquilidat.

Zaragoza s’esbodrega.

2010-12-28T17:00:00.005+01:00

Seguntes zaguers estudeos pareix que o subsuelo d’a ciudat de Zaragoza ye colapsando qual formaje grouller y tot indica que d’aquí a bells anyos caldrá fer rapel ta rezar-le t’a virgen (¡Que’n ye de triste! ¿Agora qué feremos os domingos de maitins?)

Fa bells diyas sentiemos a un jubilau d’o bico de Delicias decir que en fendo una gambada con o suyo can por a Ciudat Universitaria, o suyo can fació as suyas necesidatz en o jardín d’o edificio de geologicas, como siempre fa y qual estió a suya sorpresa quand viyó que aon yeran os pozals d’a basura amanixión bells foraus gigants que se avalón os pozals. Alavez debió dixar os zurrunyetz d’o suyo can en o jardín y asinas totz os diyas dend’alavez. Más conmovedora ye l’historia de Dn. Jusepra Bogordo que perdió o suyo tren ta Lumpiaque ya que o bus Circular2 que lo heva de levabar ta l’estación de Delicias estió minjau sin piedat por uno d’istos malvados foraus y habió de aguardar meya hora dic’o venient bus perdendo asinas qualsiquier asperanza de plegar-ie con prou de tiempo.

As reaccións d’os políticos no han tardau en amanixer: A presidenta d’o P-DO (Partiu de dreitas oregonés) afirmava que a culpa ye de Zapatero que ye crevando Espanya. Mientras, o alcalde d’a Ciudat pediva tranquilidat a totz ya que si tot continava asinas en vez de tranvía, podremos disfrutar en no guaire tiempo d’a primer línea de metro. O president d’a CCCA (Colla de caciques colocadores d'amigos) anunciava que si o suyo partido ganava as próximas eleccions fería un parque tematico en as espelungas creyando alavez trevallo y prosperidat ta tot Oregón. A JBI (Junta de baturros indepes) no ha deixau l’oportunidat ta demandar l’independencia t’Oregón ya que iste feito comtimuestra a irrefutable esferencia entre Oregón y Espanya.

Con iste panorama muitos vecinos d’a ciudat han decidiu fuyir-ne y marchar a otros lugars, como Calatayub, aon a gent se ye corrindo d’o gusto en pensando que muit luego Calatayub será a mayor “ciudat” d’Oregón. “Se ye fendo justicia, ¡Calatayub 4ª provincia ya!” exclamava una bilbilitana de bien mientras sosteniva con a man dreita un ixemplar d’o ABC recient mercau.

Continaré a informar-tos-ne. Buena nueit ta totz.

O Samaín, a nueit d'animas.

2010-10-30T17:29:00.009+02:00

Maitín en amagar-se o sol por l’horizont comencipiará o Samaín, con o que comencipa o nuevo anyo celta.

T’os celtas, en ista nueit, a zaguera nueit d’octobre ta nusatros, rematava l’epoca d’a cullida y comencipiava l’epoca d’a escuridat en a que en a primera nueit a finestra que dividiva o mundo d’os vivos y o d’os muertos disparixeva. Os espritos tornavan t’o mundo d’os vivos y vagavan por os camíns. Os vivos ta proteixer-se d’els, dixavan comida en as puertas d’as casas. A isto cal adivir atra tradición celta que consistiva en tallar as capezas d’os enemigos y fer-las servir como pozal u metendo-les una viala dentro ta que totz la viyesen, que pareix que garra relación teneva una tradición con l’atra, manimenos con o paso d’o tiempo se chuntoron en o que se conoix como a nueit d’animas, que en bels puestos encara se conoix como Samaín. En muitos puestos d’a nuesta geografía preban de conservar ista tradición fendo asabelas actividatz como fan en os lugars de Trasmoz y Radiquero (d’aon son as crabazas d’o fundo d’o blog).

Agora son os ninos os que más gosa cilebrar ista fiesta, cosa que me fa asabelo goyo, manimenos habrían de saber d’aon viene ista fiesta, qué significava, qui yeran/son/somos os celtas y por qué ye una fiesta que se ha expandiu por tot o planeta.

¡Goyoso Samaín, nueit d’animas ta totz!

http://www.trasmoz.com/

http://www.radiquero.com/

Jupiter

2010-10-15T23:49:00.006+02:00

Ya fa diyas que, como a leyenda que tos recenté ditz, os cazataires cazoron a l’onsa y dend’alavez a suya sangre contina cayindo ta tierra, ye l’agüerro que ya ye plegau y con iste cambeyo se observan tamién cambeyos en o cosmos. En fer-se de nueit se puede viyer muit bien, en alufrando t’o Este una estrela que brilla más que no a resta en o cielo, pues bien, ixo no ye una estrela, ye una planeta, Jupiter, a planeta más grand de tot o Sistema Solar y a más rápida en rotar (un diya en Jupiter dura bellas nueu horas).

A verdat ye que ye prou impresionant d’observar ista planeta ya que con unos simples prismaticos se pueden viyer (con una mica d’esfuerzo) os suyos satélites: Ío, Ganimedes, Europa y Calisto. Con tot y con ixo tos animo a que si podetz, que faigatz servir un telescopio ya que a esferencia ye prou gran y mesmo se pueden viyer bellas franchas de diferents colors ¡mesmo se dixa entrefilar “o grand orache” d’a suya atmosfera!
Manimenos, cal parar cuenta que quand se observa con o telescopio, l’imachen que i veyes no ye l’imachen tipica, quasi perfecta a la que somos feitos de viyer en revistas, tv, etc. Con tot y con ixo ye una experiencia a la que tos animo a totz.

Segeda, l'historia y l'astronomía

2010-08-21T00:55:00.005+02:00

En istos diyas, en os que fa buen orache de nueitz, estoi que totz, u a o menos quasi totz hetz visto bella perseida u hetz visto una estrela muit muit brillant enta l’este que en realidat no ye una estrela sino Jupiter (mesmo con bels prismaticos se viyen os suyos satelites). Son istos diyas quand más honra fa de alufrar enta l’atra metat. D’alufrar-ie ya en sabevan muito os antigos celtiberos.

En a ciudat de Segeda se puede trovar un santuario feito ta l’estudeo d’o tiempo. Ye o primer santuario celtibero identificau que, amás de fer-se servir ta marcar o tiempo, yera relacionau con o culto solar. Un santuario sin teito ni muros verticals, completament ubierto a l’aire. Con l’aduya d’a Geodesia y l’arqueoastronomía se ha sabiu cómo se viyeva o cosmos en o S.II a.C.Se ha comprobau que a bisectriz d’a piedra angular d’iste santuario yera alineada con o mont de l’Atalaya, chustament en l’ocaso solar en o solsticio d’estiu. O angulo de 90 graus d’a piedra angular yera alineada con o mont de Valdehornos, chusto por aon se produce l’Ocaso solar en o equinoccio ¡chusto hue! Amás, a paret mayor d’o santuario tien un azimut de 58º, dirección que coincide con a posición d’a Luna plena en o suyo momento de Ature mayor (puesto aon a luna ye más a o sur) feito que nomás ocurre una vegada en un ciclo de 19 anyadas, o ciclo Mentonico.Seguntes Francisco Burillo, o director d’o prochecto Segeda y catedratico de prehistoria d’a Facultat de Sciencias socials de Teruel “A plataforma monumental de Segeda (de planta romboidal y con una amplaria de 312 m2 ye una obra d’o Estau segedense, un calendario en un santuario, sin paralelos conoixius”

Amás, hue, sábado 21, se cilebra en Mara a Vulcanalia, remerando a luita entre romans y celtibers ya fa 23 sieglos aon se ferán bellas actividatz, recreacions historicas, mercaus…

Tres anyadas fendo huellos

2010-08-04T23:10:00.001+02:00

Fa tres anyadas que Blufi y yo comencipiemos con iste blog. Tres anyadas fendo huellos con a naturaleza, a sciencia, a geología y ecolochía, con l’universo, con l’historia y con totz vusatros que continatz pasando-tos por aquí y que dixatz os vuestros comentarios fendo más gran iste chicot puesto d’o ret.
Zaga istas anyadas tos quereva preguntar ¿Qué ye o que más goyo tos a feito?¿Y o que menos?,¿Qué cambeyariatz? Pensatz-ie y comentatz-le-ne a Blufi (U a yo si queretz)

Continaremos fendo huellos en o esdevenir como faciemos antismás y como femos hue.
¡Mersi a totz!

O Parlament de Catalunya bieda as corridas.

2010-07-28T23:47:00.003+02:00

Hue de maitins o Parlament de Catalunya plega de biedar as corridas de toros. ¿Ta quand una lei asinas t’a resta d’Espanya?

Muitos dicen que isto no ye discutible en a resta d’o país, que nomás ye cosas de catalans. Yo no estoi d’alcuerdo con ixo, en Espanya somos muitos os que no creyemos que ista barbaridat d'asesinar animals por diversión siga a nuesta “fiesta nacional” Me fa fastio y muitismo asco que se politice iste tema con que isto ye un tema de nacionalismo, y me fa muito asco y repugnancia porque ta muitos en ye y no me pareix moralment aceptable que se chuegue con istas cosas con fines político-nacionalistas, tanto d’un costau como de l’atro.

¿Ta quand una lei ta toda Espanya/mundo?

A onsa mayor

2010-07-21T00:25:00.008+02:00

Ye curioso que, civilizacións, que de primeras uno no se prexina que haigan teniu contacto, compartan quasi todas una mesma creyencia, un mesmo rasgo. Un eixemplo ye que quasi todas as culturas d’o hemisferio septentrional d’o mundo en a suya historia han visto en o cielo d’a nueit una onsa creyada por 7 estrelas. Cada una explica a suya existencia d’una traza:

Se diz que Zeus se namoró de Calisto, una ninfa d’as selvas y la fació a suya amante. Hera, a muller de Zeus, acarranyada convirtió a Calisto en una onsa.Bel diya, Calisto se trobó a o suyo fillo, Arkas, qui, en no reconoixer a su mai por estar un onso, prebó de matar-la pero Zeus bi apareixió y lo impedió y le’n explicó. Alavez, Arkas querió estar tamién onso como su mai y Zeus lo convirtió y los chitó muit alto muit alto en o cielo ta poder viyer-los siempre, totz os diyas d’o anyo. Dend’alavez en o cielo d’a nueit, siga ibierno o estiu, se pueden viyer a onsa mayor y a onsa menor. Manimenos, Hera continava acarranyada y chitó un dragón ent’o cielo ta que se metese entre os dos onsos ta que no estasen chuntos, por ixo, istas dos constelacións están separadas por a constelación de Draco.

Os indios Cherokee trovavan atro sentiu a l’existencia d’a onsa mayor, pues ta els, a onsa yera encorrida por tres cazataires mientres toda l’anyada, pero en plegar en os meses d’agüerro chusto en que se posa l’onsa sobre l’horizont, os cazataires le dan caza y a suya sagre caye t’a tierra plenando as fuellas d’os arbres de colors royas.
Istas historias me las recentó un colega que conoixié por tierras albarracinenses istas zagueras setmanas. ¡Muitas gracias Edu!

A mayor inundación d'a historia creyó o Mediterraneo

2010-07-15T21:27:00.003+02:00

Dende fa bells tiempos se son producindo bellas catastrofes naturals que nos son trucando o ficacio, por a suya rareza, por a suya naturaleza, y por as suyas repercusións.: O tierratiemblo d’Haití, o volcán Eifjafjalla d’Islandia...Manimenos cal viachar en o tiempo muito muito enta zaga ta poder alufrar una catastrofe de verdat, una inundación que contimparando a de Nueva Orleans con ista, a de Nueva Orleans no ye que una chicorrona ola de mar.

Imos a viachar 5,5 millons d’anyadas ent’o pasau, a una epoca clamada Mesiniense, que ye a parti superior d’o Mioceno. O paisache que i viyemos ye una mica diferent a l’actual. A depresión d’o Ebro ye una zona plena de grans ibons, un clima prou desertico con bells ríos que comencipian a aparixer dend’o Sistema Iberico y os Pirineus, que plegan de creyar-se fa bells 15 millons d’anyadas. Ixos ríos desembocarían en un río Ebro que plegaría de naixer y como totz sabemos o Ebro desemboca en o Mediterraneo. Manimenos en o Mesiniense ye diferent ya que o Mediterraneo ye completament xuto. Sería un gran desierto pleno de sals y chesos a más de 1.500 de profundidat y una meya de 45ºC de temperatura, nomás bells ibons hipersalinos remanen en as partes con mayors profundidatz , una entre o que hue son as insas Balears y Sicilia y l’atra arredol d’o que hue ye Chipre. Os ríos que hue desembocan en o Mediterraneo creyarían fundas renclusas de más de 1000 metros de profundidat ta plegar en istos ibons. ¿Qué pasó con o Mediterraneo? Pues pareix que u bien o nivel d’as auguas d’o Atlantico baixón tanto que dixón a o Mediterraneo aislau y as suyas auguas se xutarían ascape u bien bell movimiento tectonico trancó o paso d’o Rift (O Estreito de Chibraltar) con as mesmas consecuencias.

Ista situación que duró una mica más de meyo millón d’anyadas remató en poquismo tiempo geologicament ya que en menos de dos anyadas o Mediterraneo sufrió a mayor inundación d’a historia d’a Tierra y se plenó d’augua a una gran velocidat, de feito, o nivel d’o mar puyaría dica 10 metros a o diya, a ista velocidat Barcelona disparixería en un diya y Zaragoza en 20 diyas. ¿Qué pasó alavez? Pues no ye guaire esclatero, pero un estudeo que se fació fa bellas anyadas ta la construcción de un tunel subterraneo que chuntase Espanya con Marruecos escubrió que en o Estreito de Chibraltar bi heva una gran canal de 500 metros de profundidat y 200 Km. de largaria que se formaría por a cayida de l’augua dend’o Atlantico ent’o Mediterraneo a modo de rampa. Isto se debería u bien a un proceso tectonico que hese ubierto l’estreito de manera repentina u bien por l’erosión que habría sufriu por una parti, por os ríos que existesen en a zona d’Alborán-Chibraltar y por otra parti, por os oraches y posiblement tsunamis d’o Atlantico.

Pareix sciencia ficción manimenos no en ye. De feito, dentro de 50 millons d’anyadas o Mediterraneo tornará a trancar-se entre Espanya y Marruecos por l’empenta d’a Placa Africana ent’o norte y l’empenta por l’apertura d’o Atlantico en a zona de Islandia ento sur. Se xutará y con o paso d’os anyos, se i formará una gran cordillera por a que o Mare nostrum disparixerá ta cutio.

A luna

2010-05-22T00:23:00.004+02:00

Ista ye una foto que plego de fer fa bells menutos a la luna. No ye una maraviella d’imachen, la he feita como he puesto ya que o mío telescopio no tien l’adaptador ta camara y he habiu de fer-la como he puesto, a pulso, con l’obchetiu enfocando enta la lente… No sé como no ye salida encara piyor. Con tot y con ixo me pareix una imachen polida, que transmite tranquilidat, ixa tranquilidat que cal desfrutar de cabo ta quand más que más en comencipiar a estar farto d’estudear, como en soi yo agora.Ye una pasada d’alufrar-la en plegar-le a luz de canto ya que se veye os cráters con tot o suyo relieve. Con tot y con ixo, no he visto garra selenita ni garra animal fabuloso como fa tiempo dición de viyer bells scientificos.

Con ista dentrada nomás tos quereva convidar a que de cabo ta quand puyetz l’ambiesta a l’atra metat, a metat superior, a la d’a luna y as estrelas, a la d’os suenios, aon a tranquilidat ye omnipresent, que ya tendremos tiempo d’estar en a metat inferior……

A contradanza de Cetina

2010-05-16T22:29:00.003+02:00

O diya 19 de mayo, como totz os anyos dende fa milenios, Cetina se mete en o punto d'ambiesta d'a Celtiberia ya que se cilebrará a suya Contradanza. Antigo ritual celtibero de adoración a la luna por o que o diaple y o suyo sequito de animas blancas y negras bailan a o ritmo d'una repetitiva canta. ¿Morirá de raso o diaple ista vegada o tornará a danzar dimpués de que as animas lo maten en afeitar-lo como totz os anyos?

Tos convido a totz a que tos amanetz a ista lugaret d'o Alto Xalón y que disfrutetz d'una nueit machica de escuridat a la luz d'as hachas, en a que cielo e infierno se chuntan con o diaple y a luna como convidaus especials y en a que se siente más que no nunca a presencia d'os espritos d'a Celtiberia.

A Centaurea pinnata

2010-04-13T00:37:00.004+02:00

A Centaurea pinnata ye una planta d’a familia d’as Compuestas y d’o chenero Centaureaceae, un chenero de plantas que pareixen cardos (o cardo en ye d’a mesma familia) pero mas chicot y a mayoría no tiene punchas. Yo de nino las conoixeva como “pinyas”, isto ye por o suyo pareixiu a ista fruta, que oye, a yo me parixeva ixo, l’imachinación d’un zagalet ye inmensa, pero bueno, puet-estar que bella vegada haigatz pillau d’o solero una bolica peludeta de color blanca, que de nino yo clamaba “ángel” (isto ya yera común en totz os zagals no pas solo yo) y lo bufavas mientras le pedivas un deseyo (pareixiu a como se fa con os pixaleitos, pero os anchels van rodando por o solero). Pues iste ángel no ye que uno d’os sistemas que fan servir bellas especies d’iste chenero ta espardir a suya simient.

En iste caso, tos charro sobre a Centaurea pinnata, que ye una especie endemica d’o Sistema ibérico, exactament nomás se ha trovada en bellas sierras d’a redolada de Calatayub, como a Sierra de Vicor, Sierra de Pardos, Algairén, etc. Ye una planteta que a penas tien un palmo d’altaria, de flors compuestas blancas (pareix nomás que ye una sola flor, manimenos bi’n ha muitas más, se claman inflorescencias) Ye de carácter bianual, ye decir, a simient chermina en dos primaveras y creixe en roquedos, grietas d’a roca y ye feita a climas secos, allora, no ye una planta que pareixca sufrir guaire o impacto humano. Con tot y con ixo ye una especie catalogada como en periglo d’extinción, sobre tot por a suya chicota distribución y población.

Geología y Geosfera

2010-03-27T14:07:00.006+01:00

Tos convido a totz a que viengatz a o ciclo de conferencias que hemos parau dende l'alumnalla d'o Departamento de Sciencias d'a Tierra d'a Universidat de Zaragoza. Ye un ciclo de conferencias sobre geología y geosfera, tratando más que más de meyo ambient y o cambeo que ye sufrindo, como se i fan os insectos, como lo fevan os sers vivos fa mills d'anyadas, qué problemas tienen os repuis radiactivos, o CO2, etc. Se cilebrarán en a sala d'actos d'o edificio C (Geologicas) d'a Facultat de Sciencias. As primers 4 conferencias se fan mientres a semana cultural de geología, asinas que podretz aprofitar ta fer atras actividatz, como chuegos, esports, conciertos, amás de zorriar tot lo que tos pete baixo a nuestra palmera.

Por asistir-ne a 7 d'as 8 reciviretz 0,5 credito de libre elección.

¡Tos aguardamos a totz!

Punchatz en a imachen ta viyer-la más grand.

Icnitas

2010-03-13T13:26:00.008+01:00

A os que nos fa goyo a naturaleza y d'estudiar, pasar bells diyas estudiando en un entorno natural ye tot un privilechio. Con a universidat tiengo l’oportunidat que treballar-ie bellas semanas dica chunio. Pues me nimbioron (a yo y a totz d’a mía clase) a la parti más septentrional d’a Celtiberia, A Rioxa, aon nos dioron un trocet de terreno ta cadaún ta que i trevallemos, cartografiemos, trovemos fosiles, minerals, ta que estudeemos como yera o paisache antismás y a suya evolución.

Tot muit poliu pareix de primeras, manimenos qüand l'orache no acompanya, a nieu y a plevia pueden fer-te pasar un mal rato. En estando con os pietz mullaus, con as mans royas y talladas y tremolando de fredor s’estima más que más d’estar baixo o teito d’o bar.

Con tot y con ixo mai Tierra y a suya geología (leiga-se /t∫eolo t∫’ia/) siempre te dixan un regalet t’os uellos, bell escubrimiento u bella coseta que faiga sol u orache mereix a pena. En iste caso, entre muitas atras cosas, trovemos istas pisadetas de dinosaurio (icnitas), un dinosaurio que i vivió fa 120 millons d’anyadas, un dinosaurio que podeva alufrar ent’o horizont dende una placha tropical (sin cocoters)y viyer un mar pleno de animals que hue ya no se pueden biyer a 900 metros d’altaria y a más de 100Km d’o mar.

Pues iste ye o chicot regalo que trové un diya de plevia y nieu y encara que a muitos no les dirá cosa y les parixerá a pisada d’una pirina chigant (Cusioso, ¿verdat?) lo quereva compartir con totz vusatros.A foto no se viye prou bien, pero ye que 120 millons d’anyadas ye muito tiempo.

Estoi que ya totz prexinaretz que iste blog ha cambeyau de grafía, si no aquí la tenetz http://www.academiadelaragones.org/biblio/PROPUESTA_ORTOGRAFICA_PROVI.pdf

Una grafía una mica coixa, creigo yo.

Aragón misterioso (entre pausa y pausa)

2010-02-03T14:31:00.003+01:00

Mai Tierra me tien ficando os acons dende fa bellas semanas asinas que no he puesto escribir en o blog. Manimenos no me'n he ixublidau ya que en tener un ratet de descanso goso meter-me en o ret ta biyer as nobedatz d'os blogs.
Tamién goso biyer bel par de documentals que me fan goyo. Entre els beigo unos documentals sobre mitolochía aragonesa clamau Aragón misterioso que se emitiba dica fa una añada en Aragón televisión. Yera uno d'os pocos programas que gosaba seguir en a tb manimenos dende fa una añada alto u baixo ya no l'emiten. Con tot y con ixo bi ha un canal de tb d'Aragón ¿satelite? que se puede biyer dend'o ret ficando-se en a web d'Aragón tb.
Una d'as cosas que más goyo me fa d'iste programa ye que emiten tres mitos cada begada, uno por cada probinzia, crebando con ixe topico folklorista de Aragon=Zaragoza ziudat + Pirineus. Amás a mosica de Biella nuei que se puede sentir en a cabezera ye bien pincha.

Astí baixo tos en dixo dos leyendas.

O Gubierno franzés reintroduziría o Bisont europeu en os Perineus.

2009-12-28T21:11:00.005+01:00

Seguntes zagueras notizias que plegan dende tierras galas o gubierno francés podría reintroduzir o Bisont europeu (Bison bonasus) en os Perineus ta fer frent a os problemas deribaus d’a disparixión d’a ganadería. As güellas y as crabas representaban un papel muit important en a chestión forestal ya que minchaban os bechetals y limpiaban os monts y como pasa en España, en cayendo l’actibidat d’iste sector se produze un grau problema de acumulazión de repuis.Antismás o bisont europeu feba o papel que ha estau fendo as güellas y a crabas dica agora. Seguntes a coordinadora d’o FV (Franzia Berda) Lamaire Quetait-pariaux, ista ye a millor soluzión que se puede fer ya que amás de solucionar un grau problema se ye fendo tornar a o bisont europeu a o suyo habitat.O bisont abitó en os Perineus españols dica o sieglo XII cuan o zaguer bisont se mató en Nabarra. A suya distribución se alongaba dica Siberia, manimenos nomás en Polonia se prebó con suerte a suya conserbazión grazias a o treballo d’a Compañía internazional d’efensa d’o bisont creyada en Polonia en o zaguer sieglo.
Si ya estió polemica a reintroduczión d’os onsos no quiero prexinar-me lo que pasará agora con istos bicharrons, que se zamparán os pastos d’as güellas franzesas y españolas si pasan a muga, y amás destruirán cautivos ya que, como os elefants, istos animals gosan de estar en puestos ubiertos y con tierra mobida ta poder chitar-se-ie y rebolcar-se-ie.
Asperemos que en salga más d’informazión ya que o que se troba en o ret ye cuasi nulo. (Merci pour l’information!)

Avatar

2009-12-24T12:13:00.003+01:00

Mai no he charrau sobre zine, no ye una cosa que me truque tanto o ficazio como ta escribir-ne, ixo le’n dixo a Epi. Manimenos o martes pasau me amané a os zines d’Aragonia ta biyer Avatar. Sin mica dandaleo ye ta yo una d’as millors peliculas d’os zaguers años, l’istoria rezentada, os efectos espezials, os paisaches, a mosica…¡tot! Amás, l’historia, que se desembolica en o sieglo XXIII en un planeta clamau Pandora, ye totalment extrapolable a o nuestro planeta en os nuestros diyas ya que nimbia un mensache prou esclatero: Cal respetar o planeta, a la resta de sers bibos (sobre tot a os que son d’a nuestra raza) y que fer a guerra nos perchudica a totz, que a nuestra soziedat encara que siga a más abanzada tecnolochicament no ye a más rica nian a millor y que en aprender d’atras soziedatz nos n’enriqueixemos y nos femos millors presonas y más tolerants.Tos recomiendo que la beigatz y que m’en detz a buestra opinión.

Aprofito tamién ta deseyar-tos un GOYOSO NADAL, que tos lo pasetz bien y si por o que siga, no puede estar asinas, que as buestras penas sigan menors. ¡Un fortal abrazo a totz!

Innaugurazión de l'exomuseu

2009-12-13T12:20:00.004+01:00

Confirmau: Innaugurazión de l'exomuseu d'o Departamento de Zienzias d'a Tierra o martes 15 d'Abiento a las 5 d'a Tardi en o edifizio de Cheolochicas. Bi habrá actuazions d'artitas superconoixius como Azúcar blanquilla, Simón&aurell&Meléndez (istos son teachers), Álex Montañés, NostraXladamus y V de Burro. Amás bi habrá un chicot socalze parau por os organizadors d'a Semana Cultural de Cheolochía (se zilebrará en abril)

Tos i asperamos!

Exomuseu en a Unibersidat de Zaragoza

2009-12-03T16:09:00.004+01:00

Fa bellas semanas se instaló un exomuseu (museu a l’aire libre) en o zésped d’o edifizio de Ziencias d’a Tierra d’a Facultat de Zienzias de Zaragoza. En iste exomuseu s’exponen diferents rocas con un cartelet aon se indica a suya litolochía, orichen, edat y ambient de creyazión.
Encara que a yo a petrolochía (l’estudeo d’as rocas) no me fa guaire goyo he de dezir que ista exposizión ye prou interesant ya que grazias a istos cantals se puede reconstruyir cómo yera ista parti d’o planeta fa millons d’añadas. Grazias a ellas podemos biyer a desembocadura d’un gran río en pleno Baixo Aragón, tamién podemos biyer un mar tropical en o Puerto de Montrepós, una placha plena de cocodrilos en Ricla (¡Aragón teneba placha!) u un gran lago en Calatayub.
Isto pareix zienzia-ficzión, pero prou que no’n ye, ye zienzia.Se ferá una inaugurazión o diya 14 u 15 d’Abiento, (Tos l’abré de confirmar) ¡Bi sotz totz combidaus! Amás bi habrá una chicota borina con o conzierto de “V de Burro”.
Manimenos he de dar un tirón de orellas a os que parón l’exomuseu, pues pareix que encara que de piedras en sepan muito, de plantas y chardinería no’n saben ni zarrapita ni pon, pues ban y nos fican un cantal de halita (sal) de Remolinos en meyo d’o zésped…Encara han teniu a buena ideya de barnizar-la (no más ta que con a plebia no afectase a una roca que han meso baixo ella, as plantas a els rai) pues no contaban con que o zésped se ruxia con una cosa clamada aspersor, que con a presión con a que chita l’augua se ha minchau o barniz y meya roca d’halita. Nomás cal biyer o fermoso que ye o zésped baixo a roca, que encara que sigamos a final de l’agüerro, se esferenzia prou bien o zésped bibo y o zésped socarrau. Con tot y con ixo pareix que no ban a fer-se-ne guaire por as plantas sino por a roca que ye baixo ella que puede que se crebe por haloclastia (como fa l’augua en chelarse en as grietas d’as rocas). Asperemos que recapaziten ya que no ye solament o zésped, bi ha atras plantas, entre ellas un ginkgo, una olibera y a nuestra palmera! Que como la toquen u le pase garra se parará una gorda.

Nueit de animas.

2009-10-31T20:56:00.004+01:00

Ista tardi, como todas as tardis de 31 d’octobre dende fa 4 añadas, ninos gosan trucar a la puerta de casa mía ta dezir ixo de “truco o trato” y si no les das lamins te plenan a puerta de espuma de colors.
Me fa muita pena tot isto, no pas que os niños zilebren Halloween ya que a yo m’ese feito asabelo goyo de zilebrar-lo de chicot! Manimenos lo que me fa pena ye que se pierda o sentiu d’ista zilebrazión, a nueit d’as animas, que dica fa 30 añadas encara se zilebraba de bella traza en o mío lugar y a redolada y güe en diya encara se zilebra en iste sentiu en muitos lugars d’o Pirineu y d’o Montcayo y en tot o norte d’España en cheneral.

Ista fiesta tien o suyo orichen en a fiesta zelta d’o Samhain, fiesta que indicaba o comienzo d’o año zelta que comenzipiaba con o mes de Samonios, o mes escuro de l’año (os zeltas dibidiban l’año en 2 meses, Samonios y Giamonios, que comenzipiaba en abril) En ista nueit os espritos u almetas teneban permiso ta combibir con os bibos. Ta mantener-los goyosos y ta aleixar a os malos espritos a chent dixaba comida en as carreras.Ista zilebrazión coinzidiba con a fiesta romana d’a recullida, clamada Pomona. Supuestament ista zilebrazión se mezclaría con a zelta añadiendo uno d’os simbolos más conoixius d’ista fiesta, a crabaza.

Iste interés que tien os niños por ista fiesta debería fer-se serbir ta amostrar-les o que ye ista zilebrazión en a nuestra cultura, encara que cuasi totz os que lo zilebran en o mío lugar son sudamericans, que pareix que en os suyos países a influyenzia cultural de Estaus Chunius ye más gran. De todas trazas me fería goyo que els tornasen a bibir iste rito como lo biyón os nuestros pais y lolos. Cuan os chobens feban crabazas y las meteban debant d’a puerta ta pedir un aguinaldo, cuan ista nueit no se dixaba de tañir as campanas d’a ilesia como símbolo de paz con os difuntos que en ista nueit tornaban t’as carreras con os bibos. Y que conoixiesen, por eixemplo, que a la mala chent se les enterraban sin zapatos ta que no tornasen en ista nueit y muitas atras cosas.

Cal fer remeranza de tot isto, que en berdat “Halloween” ye más nuestro que no pas american, que encara que agora se tome a suya bersión d’a fiesta, ista se ha estau zilebrando aquí dende fa más de 2200 añadas. Isto tamién ye a nuestra cultura, cal preserbar-la como se fa con milienta zilebrazións, danzes, traches típicos, luengas…..Curiosament, as presonas que más dizen preocupar-se por a disparizión d’a suya cultura son os primers que repelen ista zilebrazión”…curioso. Será que como ye una zilebrazión que no ye solament aragonesa ya no “mola” conserbar-la….
¡Goyosa nueit d’animas ta totz!

Ista ye a web de Radiquero, un lugaret d'o Pirineu aon encara se zilebra a nueit de difuntos. http://www.radiquero.com/animas/todos.html.

O Sistema Solar ¿Somos aliens en A Bía Lactea?

2009-10-11T18:18:00.009+02:00

Fa bellas añadas que amanexió una notizia en o mundo zientifico que muitos prebón ascape de desmentir-la, pues pareix que o nuestro Sistema Solar no perteneixería a la Bía Lactea sino a Sachitario.

Sachitario ye una galaxia mas chicota que no a Bía Lactea ya que tien menos masa y debiu a isto y a la suya proximidat a Bía Lactea ye abalando-se-la. Uno d’os puntos por os que as dos galaxias se son chuntando ye chustament aon ye o nuestro sistema solar. Isto explicaría por qué o nuestro sistema solar no ye orientau en o mismo plano que a bia láctea. Isto se puede beyer fazilment alufrando o zielo de nueits y beyendo que a Bia Lactea no sigue a misma direczión que o sol, a luna y os planetas, lo que clamamos ecliptica.

Bi ha zientificos que desmienten ista teoría afirmando que a inclinazión d’o sistema solar no aporta garra dato important y que o raro ye que coincidiese, os nibels de fierro d’o nucleo d’o sol ye en o rango d’a bia láctea y nopas en o rango d’as estrelas de Sachitario.

Atros zientificos, u parazientificos, afirman que isto ye berdat puesto que debiu a isto se explicaría o calentamiento global ya que o Sistema Solar sería pasando por un punto de muita enerchía y que o calendario maya remata en o 2012 ya que en ista calenda o Sistema Solar estaría en o meyo d’a interseczión d’as dos galaxias……..zas! Iker Gimenez tremola, que plegan os Mayas. Y parixeban fatos cuan os cambeamos por un botejón…

Como biyetz encara bi ha muito que imbestigar y que bi ha opinions ta tot mesmo t’os frikientificos…

¿Que en pensatz? ¿Somos bialactianos u sachitarianos? Aspero que isto no tos creye una crisis d’identidat.

A perbersión d’o luengache periodistico

2009-09-16T20:42:00.011+02:00

Remata a temporada de cremas forestals d’estiu y pareix que lo ha feito de bote y boleo por a fredor prontinaza.

Iste estiu nos ha dixau muitas imachens que sisquiá no esen pasau, pero, desgraziadament, ye asinas. Manimenos cal aprender d’as errors encara que ta muitos as actuazions frente a las cremas han estau prous, sobre tot t’os que más abrían de pensar-ie y d’aprender-ne. Una pena.
Iste estiu tamién, como totz os estius emos estau informaus por os meyos de comunicazión, que de cabo ta cuan desinforman y embolican más que no informar-ne bien.En todas as cremas se gosa dar-ne informazión d’as ectareas cremadas, y gosamos sentir-lo d’ista traza:

“En ista crema se son cremadas dica iste momento 3000Hc, d’os cuals 2000 son de mont baixo, 500 de selba y 500 de cautibos.”

Agora caldría que explicasen qué entienden por “mont baixo”, “selba” y “cautibo”. Pareix que t’os periodistas “mont baixo” como o suyo nombre indica, ye un mont baixet, con aligars, chinestras, adorables conielletz saltando y muitas birabolas bolando entr’os romés y os tremonzillos....Pues no pas! Siento dezepzionar-tos pero mont baixo ye una masa boscosa compuesta por eixemplars naixius de chitos de zepo o radiz. O contrario estaría “mont altero” aon os eixemplars son naixius de simient. Ta que tos ne faigatz bella ideya un zepo de bit estaría “mont baixo” ya que creix a partir de chitos mientres que una parrera estaría “mont altero”. Atro eixemplo estaría una carrasca y una chaparra, a carrasca ye mont altero ya que naixe d’a simient y a chaparra en naixer con muitos chitos tien un aspecto más “achaparrau” y ye mont baixo. Isto no quiere dezir que un mont altero siga más altero que no un mont baixo. Un eixemplo estaría un mont altero de Pinus halepensis (o pin carrasco, o más común en España) con pietz de bels 7 u 8 metros d’altaria, y por atro costau un mont baixo de Sequoia sempervirens, aon os pietz pueden tener 45 metros d’altaria.Alabez ixa frase de “3000Hc, d’os cuals 2000 son de mont baixo, 500 de selba y 500 de cautibos” Ye como si dizesenos “Han trobau a 6 presonas y 2 rumans metendo fuego a o mont.”

Ir a una notizia

Atra lindeza d’os periodistas ye cuan dan por controlau a crema chusto cuan ista ya no puede continar ent’abant, cuan en reyalidat ista fase se clama “liquidazión”. Una crema ye controlada cuan encara bi ha flamas pero se sabe a suya amplaria y dic’aón plegarán. Ye dezir, una crema puede estar controlada porque se sabe que en plegar en bel río, por eixemplo, no podrá pasar-ne, pero contina cremando o mont dica que i plega.

Ir a una notizia
Aquí se diz que encara que a crema siga "controlada" encara que os medios terrestres "continen bichilando"....... No te fote, ye que encara bi habrá flamas, u qué?

Atra error que gosan fer ye omitir a existencia de parte d’o dispositiu anti-cremas, como son os retens forestals u os bichiláns. Cuan bi ha bella crema sabemos que i ban os bombers, os militars, pero…..¿os reténs? ¿Qué parola ye ixa?..........ah!! os forestals! (atra error) y de cabo ta cuan beyemos como bel intrépido ziudadano sale en a TB dizendo que ha estau él qui ha bisto primero a crema y que grazias a que ha clamau a o 112 han puesto extinguir-lo……¿belún sabe lo que ye un bichilant forestal y lo que fa?...Ye bien que a chent siga sensibilizada y que aduyen, pero puestar que cuan ixe señor aiga clamau o bichilant ya lo aiga feito fa tiempo, manimenos os bichilants no amanixen en os medios.

Atra grau error ye no saber distinguir entre ofizios. Tos sorprendería sentir en a TB “l’auxiliar d’enfermería ha puesto satisfactoriament reyalizar l’operazión de trasplante de corazón” Manimenos fa 2 añanas sentibanos tamién en a TB como un Achent d’a proteczión d’a naturaleza eba meso fuego a o mont ta que l’alongasen o contrato………..A beyer, os achents forestals son funzionarios y tienen a graniza suerte de no tener un contrato que remate cada temporada como pasa con os treballadors de retens, que estión os que en berdat metión o fuego.
Ir a una notizia

Y como istas podrianos trobar-ne asabelas. ¿No son os meyos de comunicación asesoraus por a reyal academia d’a luenga española ta fer serbir bien o luengache? Pues pareix que nomás fan que os periodistan digan “se lo dije” en bez de “se la dije”. Tamién podrían asesorarse sobre istos temas antis de embolicar-nos, porque pareix que lo que se diz en a tb ba a misa, y nos creyemos tot.

Ir a una notizia

Ir a atra En ista se meten a os polizias ¡zas! Mai no'n he bisto dengún en una crema.

Asperemos que a proxima añada siga millor, y que os periodistas no aigan de charrar-ne.

O diya que redotemos a os romans.

2009-08-21T23:40:00.003+02:00

Maitín se zilebra en o lugar de Mara a Vulcanalia. Una fiesta d’orichen roman, pero que en ista tierra pilla atro sentiu, pues fa 22 sieglos os romans estión redotaus por as tropas zeltiberas en a ziudat bela de Secheda en ixe mesmo diya.Dende fa ya güeito añadas se remera iste feito con una fiesta con recreyazión istorica en iste lugar, Mara. Amás o diya 30 se zilebrará o diya de puertas ubiertas en que se podrá besitar a ziudat con as suyas nobedatz.

Cal dezir que iste estiu ha dixau un granizo trobo, pues una plataforma que se trobó en os arredols de Secheda en o año 2004 pareix que seguntes zaguers estudeos en iste estiu han determinau que ixa plataforma estaría o primer santuario zeltibero y zelta d’a Peninsula iberica. Estió construyida con forma romboidal y de traza que una d’as suyas bisectrizes ye orientada ent’o mon de l’Atalaya, puesto per an s’amaga o sol en o solstizio d’estiu. Os zeltibers, como totz os zeltas beneraban a la luna y a o sol y por ello zilebraban os solstizios y os equinozios, as nueits más larga y más curta, entre atras fiestas zilebraban o Lugnasadh, a fiesta d’a cullida en onor a o dios Lug, o dios d’o sol.

Ta saber-ne más: http://www.segeda.net/

Continamos fendo huellos por secundena añada.

2009-08-19T22:45:00.002+02:00

Iste mes d'agosto zilebramos o cabo d'año de Fendo huellos y de Blufi.

2 añadas en as que he charrau d'o que más goyo me ha feito, encara que menos a sobent d'o que me'n ese cuacau pero ye que no adubo a tot encara que siga d'estiu.

Mersi a totz os que continatz leyendo-me dend'o primer inte dic'agora y a os que me sigatz leyendo dende no fa guaire y sobre tot, mersi por os buestros comentarios.

Continaremos ent'abant fendo huellos aspero que por muito tiempo!

Plegan as Perseidas

2009-08-12T21:51:00.002+02:00

Como totz os años, en plegar istos diyas d’estiu tenemos a oportunidat d’alufrar uno d’os espectaclos naturals que más marabiella. Son as Perseidas u glarimas de Sant Lorién.Encara que a suya existenzia tienga una explicazión zientifica puesto que son repuis d’a coda d’un meteorito que en plegar en a atmosfera se creman produzindo a suya incandeszenzia, o ser umano contina beyendo-lo con güellos inozents, creyando un ambiente machico a o suyo arredol.

No ye a millor plebia pero en ye d’as millors y a más alufrada debiu a o buen orache d’o estiu y que a chent ye de bacanzas, manimenos ista añada ye especial ya que as boiras ban a dixar beyer-las en cuasi totz os puestos amás que a luna en estar cuasi nueba permitirá una escuridat que fera onra.

Ta beyer millor as perseidas cal mirar entre as constelazions de Perseo y Casiopea(N-NE, alto u baixo, Casiopea se distingue prou bien perque tien forma de W) ya que o suyo punto radiante(d’aon aparixen) se i troba.

As flamas afogan o estiu.

2009-08-01T23:22:00.007+02:00

Iste estiu ye estando trachico a o que cremas se refiere. Miles d’hectarias en toda España han estau pasto d’as flamas. Mesmo han muerto presonas fendo o suyo treballo! Contimparando ista temporada con as zagueras, ye a pior por goleada (sin contar ixas pobres chents que morión en Molina fa 4 añadas) a o menos dende que yo tiengo esmo. A pior parte la ha lebau as redoladas d’as Cuencas mineras y Sierra d’Arcos con más de 11mil hectareas cremadas. Atros puestos afectaus por as cremas en a nuestra tierra han estau as cremas de Purroy-Morés fa cuasi dos semanas, tamién en Laina-Medinazeli en a redolada soriana de Tierra de Medinazeli, Jaulín ista semana y güe mesmo atra crema en os monts de Valtorres-Terrer que yo mesmo he presenziau con o miedo de tener-lo tan amán y que a la fin d’ista tardi 500 hectareas se yeran ya cremadas.
Ista zaguera crema de Valtorres se ha produziu en o mesmo puesto an que l’añada pasada s’en produzió atra, pero ista begada a calor y o biento que i feba han estau mas fuertes que no fa una añada y ha pasau lo que ya se prexinaba fa tiempo. Ixe mesmo biento que alimentaba as flamas ha estau o salbador d’o lugar de Valtorres, que a escasos 500 metros de l’orichen se ha salbau por estar en sentiu contrario aon o biento soplaba.

Os monts son plenos de fusta que cal limpiar y la chent ya en ye farta, pero os d’astí alto que PARten o abadexo dizen que no bi ha prou de diners. Manimenos creigo que con os diners que son fendo serbir istos diyas bien se baldría contratar a mas chent ta amortar as cremas d’ibierno, que ye asinas como creyemos que se han de amortar, d’ibierno, amás de fendo una buena chestión en fer-se as replantazions, que tamién trobar-se con un pinar con pins que parixen cañas de pescar y que cuasi no puedes andar por meyo por a densidat que bi’n ha…..tampoco no ye plan.

Dende aquí un fortal abrazo a totz os que lo etz pasau mal, sobre tot a aquels que etz perdiu a una presona quiesta u a buestra traza de bibir, puesto de treballo, etc.Aspero que istas rebesadas podrán fer reflexionar a os nuestros supuestos representants políticos y que beigan que isto asinas no puede continar ent’abant.

Nueit de Sant Chuan.

2009-06-23T23:24:00.005+02:00

Güe ye a machica nueit de Sant Chuan. Que prou que no cal que tos esplique qué en ye, totz lo sabetz. Pero ta yo (y ta muitos atros esclaus d'as nueits debant d'un libro) ye o diya que rematan os desamens! A os que encara tos mancan bels diyas, muito animo! Nomás ye o zaguer trango.

Aspero poder escribir más a sobent encara que ya aiga comenzipiau a treballar.

Como curiosidat tos boi a explicar lo que se fa en o mío lugar ista nueit. No se fan fogueras ni cosas d'ixas. En o mío lugar os mozetz ban recullindo os tiestos d'as farchadas d'as casas y los meten en o cobalto d'o puent d'o río. Prou que a la chent no le fa brenca goyo y en plegando a nueit se gosa meter-los dentro de casa. Manimenos siempre bi ha belún que lo ixublida.

Amás en as puertas d'as casas d'as mesachas se gosaba dixar un cardo (no como simbolo de que estase fiera sino que belún la quereba u simplament porque sí, siga mesacha, mesache, choben, biello mesmo a o cura) encara que dende fa bellas añadas ya no se fa isto (Con o goyo que me feba de reyir-me d'as bezinas que en salir de casa suya se trobaban con semejante cardo...).

Bueno, no dixa d'estar una tradizión más, curiosa, fata, como lo beigatz. Pero lo que cal agora ye ixublidar-se d'os desamens!

Goyoso estiu ta totz!

Contradanza de Zetina

2009-05-30T19:18:00.005+02:00

Iste mes nos dixa ta comenzipiar ya a recta final d’o curso! Istas mans y istos güellos que güe escriben ya son fartos de beyer y tocar chesos, de describir fallas, de glaciars, de paleodolinas y de tot en cheneral, pero ye lo que cal agora.
Iste mes nos ha ofreziu tamién, como totz os años, un poliu espectaclo d’o que Aragonía tamién se’n fazió eco. Se trata d’uno d’os pocos rituals zeltiberos que encara se zilebran en Zeltiberia. Ye a Contradanza de Cetina, que se zilebra totz os 19 de mayo en onor a San Lorién. Ye un antigo ritual zeltibero d’adorazión a la luna en a que güeito contradanzaires se bisten con bestius negros y blancos con a cara zaboyada por mascaras y un atro danzaire representando a o diaple se biste de royo con boina roya.

Tot o lugar queda nomás con a luz d’as “hachas” que portan os güeito danzaires que els mesmos fan con cuerdas y pez. O diaple guida o baile y completa cada “mudanza”, bi’n ha tantas que no se puede fer-ne que bels trenta, tals como “el dios de las aguas”, “Batán por alto”, “La vuelta de la campana” u “Los arcos”. En rematar istos comenzipia una pantomima clamada “el afeitao” en a que a o diaple posau en una siella se le amanan os contradanzaires ta afeitar-lo, le quitan o diner y lo matan cayendo a o solero. Dimpués le ploran y lo leban por denzima d’os güembros con as “hachas” debantadas, tornan a dixar-lo en o solero y resuzita rematando a contradanza con un baile más escapau como de apoteosis final. Tot isto acompañau por una mosica muit muit repetitiba.

Curiosament, pareix que antismás o diaple yera una persona que eba estada condenada a muerte. Prexinatz con qué goyo bailaría el pobrezico, que ye esclatero, no resucitaría dimpués de estar afeitau como se fa güe.

Astí baixo tos dixo bel par de bideos. Tos animo a que o prosimo 19 de mayo tos amanetz a Zetina y que disfrutetz d’iste anzestral espectaclo. De momento, que tos baiga bien con os desamens y si no’n tenetz, sentius afortunaus.

22 d'abril, diya d'a Tierra

2009-04-22T18:59:00.004+02:00

“…Os nuestros muertos mai no ixublidan iste fermoso mundo que les dio bida. Els encara aiman sus berdas bals, os suyos remorosos ríos, as suyas magnificas montañas, as suyas alpartadas cabañeras y ibóns y baías de marguins berdas y siempre sospiran con un amoroso
afecto por os sers bibos de corazons solencos, y a sobent retornan d’o goyoso estanco de caza ta besitar-nos, guidar-los y conotar-los…”

Ista ye parti d’a rispuesta d’o Chefe Seattle a os colons americans que quereban mercar as suyas tierras y nimbiar a la suya tribu a una reserba fa 122 añadas.Os antigos indios no entendeban cómo se creyeban os blancos capables de mercar bella cosa como a tierra. Ta els ixo yera imposible, l’ombre no puede poseyer a Tierra, ye a Tierra qui poseye a l’ombre.

Pues sí, encara que güe se charra muito sobre a “supuesta” destruczión d’a Tierra por l’aizión d’o ser umano, a la tierra rai, en piors situazións ha bibiu, Que aumentamos a cantidat de CO2 atmosferico, a ella rai, malas que la palmemos ella solica en bels millons d’añadas lo soluziona. Que regalamos o chelo d’os casquetz polars, a ella rai, ella ya lo iba a fer sin a nuestra aduya, encara que ella nos iba a dixar bel par de sieglos más ta fer-nos-ie.

¿Cómo podemos poseyer garra cosa que nos domina? Como diz a canta de Jimmy Fontana “He abierto os güellos ta beyer arredol de yo, y arredol de yo chiraba o mundo como siempre”

Con istas parolas quereba remerar o diya d’a Tierra, que se zilebra totz os 22 d’abril, ¿No lo sabebatz, berdat? Ye que no se fa garra actibidat, manifestación, nada de nada. En a facultat de cheolochía de Zaragoza güe se han feito bellas actibidatz, chuegos, charlas, etc. Pareix que cada año se fan más cosas interesants. Aspero que continen asinas y que a o año prosimo tos pueda combidar a totz a ir-ie.

Tornan os cursos d'estiu d'a Unibersidat.

2009-04-17T16:53:00.004+02:00

Atro año tornan os cursos d’estiu d’a Unibersidat de Zaragoza, sin cuasi cambeos en a suya oferta. Creigo que istos cursos son una buena oportunidat ta conoixer cosas nuebas, porque te fan goyo, porque te fan onra u simplament porque te truncan o ficazio. Tamién ye una oportunidat ta ir-se-ne de bacanzas ¿por qué no? U tamién ta conseguir creditos de libre eleczión.

Si tos fa goyo a botanica y o senderismo tos recomiendo o curso de botanica que se fa en Tarazona dend’o 29 de chunio dic’o 3 de chulio sobre a botanica d’o Moncayo. Yo bi estié l’año pasau y ye un curso muit muit majo. Totz os diyas se fa una cursa a bel puesto d’a redolada d’o Moncayo, se aprende asabelo sobre botanica y os puestos aon s’en ba son muit polius.

Tamién se torna a fer en L’Ainsa o curso sobre a biolochía d’a conserbazión. Un curso aon se meten en practica tecnicas de seguimiento y conserbazión d’espezies animals y bechetals, como son os chizars y os clunchigüesos. Ye laminero iste curso, eh!

Como nobedat se fa por pimer begada en Chaca un curso sobre cremas forestals con supuestos practicos que tanto goyo me fan….. Cal dezir que iste curso se fa dend’o 7 dic’o 10 de septiembre, en plena epoca de desamens…….Una pena, m’ese feito goyo d’ir-ie.

Y como istos una larga lista de cursos, como o curso de cheolochía de Chaca, cursos de arqueolochía en Calatayub (¿Ta cuán un curso sobre Zeltiberia, por fabor? ) Y tamién os cursos d’a Unibersidat d’estiu de Teruel, que tamién tienen buena pinta.

Asinas que ya no tenetz excusa de dezir que no fetz cosa d’estiu. Conduzitz-tos-ie ascape! Puestar que nos trobemos.

Ta saber-ne más:

http://www.unizar.es/cursosdeverano/

http://uvt.unizar.es/

A Tierra ¿Ye una uga pansa u un flan de galletas?

2009-04-09T16:17:00.008+02:00

Güe en que leyeba un libret sobre l'istoria d’o mío lugar, que en o suyo tiempo me parexió prou pincho, me he trobau una sorpresa que me ha feito asabela grazia. Pues resulta que iste siñor que escribió o libro en 1925 nos amuestra as ideyas zientificas que teneban en aquels años, y entre tot isto, nos charra sobre a formazión d’as montañas y diz isto:

“…Ye teoría cheneralment azeptada por os cheologos que a Tierra estió en un grau de fusión completa en a suya primer epoca y que zaga ista fusión debió seguir o suyo enfredamient,…,en enfredar-se, a superfizie achicó a suya amplaria fendo que se creyasen rugas como lo fa una mazana u as ugas en tornar-se pansas….”

Sí, como podetz leyer en ista epoca no sabeban garra sobre a tectónica de placas, a deriba continental. Estió Wegener uno d’os zientificos que estudión iste tema en ista epoca, con muita polemica, prou que sí.
Güe sabemos que as montañas se creyan por muitos motibos, pero o prenzipal ye o trepuzón entre placas tectónicas. Como nos amostraba un mayestro de 1º d’a E.S.O. a Tierra estaría un gran flan y os continents estarían galletas. Si o flan de abaixo se muebe, as galletas lo fan tamién, chuntándo-se unas con as atrás y trepuzando, belunas se crebarán, se partirán en 2 y se moberán en diferents direczións , atras se meterán denzima d’atras. Pues isto mesmo pasa con as placas tectonicas y d’ista traza se creyan as montañas.
Como prueba d’isto, podemos beyer que a costa oeste d’Africa ye igual que a costa este de America, amás, podemos trobar-ie os mesmos fósils, mesmas estructuras cheolochicas, encara que güe sigan dos continents que se troben muit luen.
L’Himalaya se ye creyando debiu a o trepuzón entre l’India y Asia, ¡¡y encara contina!!

Se podría meter-ne muitos exemplos que corroboran a teoría d’a tectonica de placas y a deriba continental, manimenos ¿Qué en pensarán os zientificos de dentro de un sieglo? Puestar que piensen o mesmo que nusatros somos pensando sobre as teorías d’o pasau. Ya bi ha bels zientificos (entre els uno en Zaragoza) que diz que isto no ye berdat (me fería goyo de conoixer a suya teoría)
Os tiempos cambean, as ideyas tamién, mientres, a tierra contina chirando como siempre, lo que nustros pensemos, a ella rai.

Pandicosa

2009-03-14T19:53:00.008+01:00

Qué poliu ye de biachar y de conoixer nuebos paisaches, nuebos lugars, nuebas chents... Biachar encara que siga mientres un diya y no muit luen, siempre bi ha bel puesto a escubrir. Y lo digo yo que cuasi no he biachau (¡qué sorna!) A begadas a manca de tiempo u de diners u mesmo a preza de dixar a monotonía fa que preferamos rimaner en casa.

Ista semana soi iu a un puesto una mica luen d'a casa mía, soi iu a Pandicosa, en o más recondito d'os Perineus, practicament esconoixius ta yo (Si cuasi ese plegau antis en Toledo que no en ixe lugaret!!) . He de dezir que mai no i yera puyau dic'alabez y a berdat que me ha feito asabelo goyo tanto Pandicosa como os arredols. O contraste d'a calor que i feba (iba en chambreta) y a nieu que encara i eba en as tucas d'as montañas y mesmo en as carreras, yera prou curioso. A botanica y a cheolochía d'a redolada son asabelas interesants. O contraste d'os pins berdes con a nieu blanca d'as montañas y o chelo d'os ibons, fa a delizias d'os freaks que estudeamos a mai Tierra(Encara que me ese feito más goyo de beyer os caxicos berdes, pero ye berdat que en tornar-se-ne ya no habrá ni gota de nieu, lastima).

Aquí tos dixo dos fotos d'o ibón (chelau) de Pandicosa, aon se troba ixe famoso balneario De 5 estrelas aon se queda incomunicada a chent por as abalanchas (a yo no me fazió o morro cló) As fotos no son tan polidas como as de Felqueral, pero a yo me fan goyo y con ixo ya bi'n ha prou.

Os fosils en a istoria.

2009-02-27T23:32:00.008+01:00

Actualment, totz sabemos que os fosils son restos de orichen biolochico d’o pasau, que por prozesos cheolochicos han puesto conserbar-se dica l’actualidat. Dengún no piensa que os fosils son nomás piedras que casualment tienen forma de sers bibos, ya que as inbestigazións que se han feitas nos dixan prou claro o suyo orichen. Pero, ¿Qué en pensaba a chent d’antismás?

Ya os Neandenthals comerciaban con fosils. A mas antiga prueba d’ello se troba en a Borgoña francesa, an se trobón en una espelunga fosils marinos de diferent prozedenzia. Muitos de els emplegaus en collars y zinturons . Ta els, os fosiles serían sers sobrenaturals, con poderes y se feban serbir en rituals como en intierros o como proteczión.

Os echipzios antigos ya deduzión que o Nilo estió baixo o Mediterraneo ya que se i troban fosils marinos.

Bels filosofos griegos, entre els os Presocraticos, afirmón que os fosils en a costa mediterranea serían restos marinos d’epocas pasadas que se i trobarían por imbasions d’o mar.
Tamién podemos trobar en a suya mitolochía diferents trazas de explicar la presenzia de fosiles:
Homero nos charra en a suya obra “L’Odisea”sobre o chigant Polifemo, un ser con nomás un güello de gran grandaría, os ziclopes. Isto se explicaría por la presenzia de restos fosils de mamuts enanos en as insas d’o Mediterraneo. Istos animals, como os elefants, poseen un gran forau nasal, que a l’ambiesta d’os griegos, yera o forau aon se situaría o suyo güello.

Os Grifos son sers metat alica, metat león que guardaban asabelos tesoros en as montañas d’Orient, casualment astí se pueden trobar fosils de Protoceratops y Psittacosaurus (conoixiu como dinosaurio loro por o suyo pico), dinosaurios con una morfolochía muit pareixida a la d’iste ser mitolochico.
Ta atros filosofos, como Platón y Teofrasto, os fosiles serían caprichos d’a tierra. Naixerían a partir de simient, como lo fan as plantas. Pero os romans no se quedón cortos y afirmón que os fosils se formarían en a tierra espontaneament, como lo feban as moscas, gusanos y mesmo os zorzes. (Os zorzes se formarían en dixando una caxa con trigo y ropa biella mientres bels diyas)

En a cultura china se creyeba que as conchas fosils que se trobaban en as montañas s’eban creyadas baixo l’augua. Por exemplo, os braquiopodos Spirifer tienen as suyas balbas muit alargadas y se creyeba que yeran golondrinas (En bels puestos de nuestra tierra les claman mariposas, por o mesmo motibo)

T’os hebreos, os fosils serían sers castigaus por dios, como se puede comprobar en o Genesis aon se rezenta l’istoria d’a muller de Lot, que se combierte en una figura de sal por desobedecer a dios.
Ya en a edat meya a teoría sobre l’orichen d’os fosils no millora.
Os arabes, creyeban que os fosils se formarían a partir de un barro con una enerchía que en contacto con o sol u l’augua se coagularía. Tamién creyeban que atros fosils serían animals y plantas que petrificarían en pasar por ziertos foraus d’a tierra aon amanarían ziertas enerchías.

Seguntes os cristians, en un principio os fosils estarían os desechos d’o taller de Dios. Al igual que Adán estió creyau a partir d’o barro, os fosils no abrían teniu a suerte de rezibir o don d’a bida. Dimpués se creyó que a presenzia de fosils marinos en as montañas se debeban a o dilubio unibersal.

Istas ideyas no cambeón dica que Leonardo da Vinci en os sieglo XV afirmó que os fosils yeran restos de sers petrificaus d’o pasau, a mayoría bibiría en o lugar aon se trobón y que se troban ordenaus por capas. Niega la teoría dilubista, como os presocráticos.

Un caso curioso ye l’alemán Beringer, profesor d’a Unibersidat de Wurzburgo, o zaguer defensor d’a idea platónica de l’orichen inorganico d’os fosiles. Estió engañau por os suyos alumnos, que le enterraban extrañas figuras que els mesmos eban paradas artesanalment en piedra ta que o suyo profesor las trobase. O profesor argüelloso d’o que eba trobau , describió os fosils inchenuament en o suyo libro “Lithographie Wirceburgensis” fendo a risa de toda a comunidat zientifica.

A mayor bolsa de petroleo d'o sur d'Europa en os Monegros.

2008-12-28T20:28:00.005+01:00

¿Mai no tos ha pasau que en beyendo bella notizia en o periodico tos datz cuenta que no le dan a importanzia que tien? Pues güe de maitins fendo una güellada a o Periodico de Aragón, en una chicota columna leigo que en Monegros han trobau a más ganiza bolsa de petróleo que mai no se ha trobada en o sur d’Europa!
Pues sí, mirando-me-ne informazión en os míos libros de cheolochía istorica en Aragón ya fa bel sieglo que se i fazión prospeczions. Estió a Unibersidat de Madrid con colaborazión d’a UT (Unibersidat de Texas ) y d’a USGS ( Investigazión cheolochica d’os Estaus Chunius) que en 1910 fazión prospeczións por totz os puestos an cheolóchicament se podese trobar-ne. Y uno d’ixos puestos estió os alrededors d’Ontiñena. Os suyos resultaus estión negatibos. A o menos ixo dizió l’informe que os americans fazión t’a Unibersidat madrileña.
T’os que no lo sepan. Os puestos más propizios ta que en i aiga, son puestos aon se aiga formau cualsiquier estructura cheolóchica que funzione como “trampa” fendo que o petróleo se i quede reteniu. Pues bien, en iste puesto trobamos un pliegue de materials impermeables formando un “mega-pozal” de bels kilometros d’amplaria, que alza iste poliu liquido.
Casualment, iste puesto se troba chusto en o meyo d’o que puestar que siga Gran Scala ¿Casualidat? Os directors d’a interpresa ILD, Pierre Luis Amancic y Paul Stephane Allegrini niegan saber-ne brenca, seguntes os suyos tecnicos a posibilidat de trobar-ne ye nula. Dizen isto a la bez que negozian agora más que nunca a crompa d’ixos terrenos a os suyos propietarios……….Sin parolas………
¿Pero en qué piensan ixas chents d’os Monegros??? Caldrá saber-ne más.
Aquí tos dixo con parti d’ista notizia en bersión dichital.

Goyoso Nadal

2008-12-16T23:28:00.005+01:00

Dende fa ya más de un mes que teneba a mi pobret Blufi sin poder fer huellos como a el le cuaca. Ye que no aiga teniu prou de tiempo, manimenos en posar-me debán l'ordenador, no sabeba sobre qué escribir-ne. Será a fredor de l'ibierno, será iste zierzo a o que encara no me i feito, u puestar que siga a nieu que no plega en a bal, o cansanzio que produix l'estudio de mai Tierra u quimisió!!

Agora que Nadal ya ye plegau (en o Sabeco ya plegó fa más de un mes), pareix que uno se obliga a posar-se y escribir-tos ta que no pensetz que isto ye muerto.
Istas fiestas no me fan guaire goyo. O sentiu que le somos dando a totz isto. Mercar, mercar, y más mercar. Manimenos tamién ye o tiempo de soniar, soniar que tornas a estar con os tuyos amigos, a tuya familia. De seguro que si os reyes magos existesen les pediríamos tornar a beyer a a ixos que ya no bi son, que marchón u simplement ixos que bel diya as suyas bidas siguión un camino diferent a o tuyo y continan fendo a suya bida luen de tu...siquiá!

Asinas que tos deseyo un Goyoso Nadal y Buen Año, que tos reposetz, que tos trobetz con os buestros amigos y familia, y que os buestros deseyos se cumplan.

Nos beyemos luego.

O linze boreal torna t'os Perineus.

2008-11-01T23:16:00.007+01:00

Güe tos traigo una muit buena notizia que salió en os meyos fa una semana. Ye a reintroduczión d’o linze boreal u europeo (Lynx lynx) en os Perineus. Iste felino bibirá en cautibidat en unas instalazións en Les Planes de Son, manimenos puestar que a suyas criyetas puedan vivir en libertat.

Fa bels meses charré sobre atro d’os nuestros linzes, o linze iberico. Istas dos espezies bibirían chuntas en o ecosistema pirenenco dica que en disparixión. As prenzipals esferenzias son que o linze boreal ye más gran, bibe más que más en bosques y que caza animals más grans como cuerzos, chizars, encara que tamién caze coniellos, zorzes,etc. Iste feito puestar que siga interesant t’a suya reintroducción ya que en estar en a capeza d’a pirámide alimentizia fa presión sobre atros carniboros fendo que atras poblazións d’atras especies creixcan.

Ista espezie se puede trobar en o continent europeo y asiático manimenos ye sufrindo un proceso de extinzión en europa occidental encara que siga abondant en Rusia y Siberia.

Bi ha bellas subespezies como o Lynx lynx lynx que abita dende Noruega dica Siberia o Lynx lynx carpathicus que orichinalment abitaría dende Reino chuniu dico Mar negro, o Lynx lynx wrangeli que abita en Kamtchatka, Siberia oriental, Mongolia y Manchuria, representa o 80% d’os exemplars de linze boreal, etc.

Ista notizia amaneix dimpués d'a enrestida de un onso en a Bal d’Arán, que aspero que no siga un impediment t’a reintroduczión d’espezies autoctonas dispareixidas sino una buena excusa ta charrar-ne y poder plegar en un acuerdo.

¡Caldrá amanar-se-ie ta beyer-los! ¿Qué tos pareix?

De cantals y plebias.

2008-09-28T23:06:00.007+02:00

O que goso fer en obrir bel periodico ye mirar-me o primer a seuzión de redoladas, nomás ta beyer si bi aparix bella cosa d’o mio lugar (cosa que nomás ocurre una begada cada 100 añadas). Ayere estió uno d’ixos diyas en a que o nombre de Alfama d’Aragón aparix entre as fuellas. Pero en habiendo leyiu o titular ya beyé que no yera garra bueno. Un cantal de bellas güeito toneladas y cuasi dos metros d’altaria s’eba cayiu a o lugar dend’a montaña. Ya prexinaretz a cara de boniato que se me quedó en beyer en a foto que semejante mazacote yera a bels metros d’o almazén an alzo, entre muitos atros afers, o mío auto. Menos mal que se quedó astí posadet en o canto d’una paret, asinas prebocador, como si querese tornar a cayer (tienen ixa manía as piedras)

Ye un cantal de salagón prozedent d’o Cretazico superior (-100 a 50 millons d’añadas), estió meteorizau más que más por l’aczión de l’augua, esleyindo-lo. Iste feito chunto a la plebia d’ista semana fazió que o cantal s’eslurtase baixando a ripa ent’o lugar. Istos cantals gosan modificar-se en contautar con l’augua. U bien se esleyen creyando fenomenos karsticos (estalactitas, estalagmitas, espelungas, etc) U bien se da “l’efeuto de falca” en o que l’auga se fica entre as crepas d’a roca y en chelar-se aumenta o suyo volumen crebando-la.

Puyando por a ripa se pueden beyer as esferras que a roca fazió en baixar, arbols rancaus, trozes d’o cantal que se crebón por o camín, muros esbodegraus…
Isto no ye un feito aislau, dende cutio muitos cantals han cayiu sobre casas, garaches, parideras, lebando-se tot o que pillaban por o camín. Amás si puyamos por a ripa se puede beyer que bi ha cantals sueltos mesmo d’una amplaria mayor que a d’iste zaguer.

>Ta prebar de solucionar-lo fa zinco u seis añadas se instaló un sistema de retes metalicos ta pribar y amortir a cayida. Manimenos no se fazió en totz os puestos. Asinas que dende Fendo huellos yo y Blufi queremos dar una estirada de barbas y bigotes (os 4 pels que le restan) a os maximos responsables d’iste treballo a meyo rematar.

A fin d'o berano

2008-09-16T23:25:00.005+02:00

Ya ye rematando atro berano, un berano que remeraremos por haber sobrebibiu a crisis economicas, ixuqueras que dixaban sin augua bels ríos, una expo suposadament de l’augua que teneba menos rigor que un cartel feito por un nino de prescolar (pero con muitos millons por meyo). Tamién hemos sobrebibiu a l’apocalipsis y a o caos que una maquiabelica maquina clamada LHC iba a sembrar en l’uniberso y que iba a creyar un forau negro que iba a abala-se a Tierra como qui mincha una fraga.

Tamién remeraremos iste berano por atras cosas como a crema d’os monts de Zuera, unos monts asabelo polius con rutas senderistas y especies bechetals que en pocos puestos se gosan beyer. Totz años ye o mesmo, cuan pareix que ye l’añada con menos cremas, bi ha un GIF (gran incendio forestal) que crema o 90% d’o total, l’añada zaguera estió en Torre de las Arcas, con a trista remeranza d’a muerte d’una Achent forestal y ista añada, Zuera con cuasi 3000Ha.

Son muitas as armiellas d’a cadena que s’encarga d’o suyo amortamiento: bichilans, emisoristas, retens, APN’s (achents d’a proteuzión d’a naturaleza), elicopteros, idroabións, autobombas, boluntarios, etc… Manimenos cuan un meyo se fa eco d’a notizia mai no s’ascuita garra d’istas presonas pero prou que se’n fan d’os militars qui i son ius a “aduyar”. De seguro si fetz remeranza d’o que se dizió y escribió sobre Zuera, remeraretz a la menestra Chacón salutando a os militars de turno. ¿Y a os APN’s, retens etc etc que tamién yeran fendo o suyo treballo?……..no, ixos a muyir fardachos.

En istos moments podemos comparar opinións muit dibersas, como as que un periodico aragones amostró: Un señor deziba que se yera malfurriando muitos diners en pagar a chent ta amortar incendios puesto que no bi ha que 2 ó 3 a l’añada y que mientres no fan cosa(desinformazión total) Manimenos una señora deziba que si se sapeba que ixe mont gosa cremar-se una begada cada 15 añadas, como que no i feba un “reten de guardia” ta amortar-lo (no prexino que pasaría si se chuntarsen istos 2 siñors con opinión tan dispars) Siga como siga o comentario, tot ye ta fer mal.

Atro exemplo estió fa bellas semanas, una crema en os monts de Baltorres, yo mismo, que treballo de bichilant, debié abisar d’o inzendio. Tot estió en un moment, os meyos i plegón ascape y tot quedó en una estreta. Manimenos a o diya prosimo en os meyos dizioron que tot se salbó grazias a un motorista que beyó a crema y clamó ascape a o 112 y que mesmo se mobilizón os militars d’o serbizio d’emerchenzias…………t’os meyos no bi abió ni bichilants, ni retens, ni na de na, nomás os melitars y un motorista intrepido…

Tot podría quedar-se asinas, como si no estasenos que pantasmas, pero no, tot pareix un complot contra os “forestals” puesto que encara que no les ne agradixen o bien que fan, si que les culpan d’os delitos d’atros. Fa una añada totz os meyos afirmón que un Achent forestal muit intelichent tenió a brilant ideya de meter fuego a un mont ta que l’enamplasen o contrato. ¡¡Agora sí qu’en charran!! Pero bi eba una cosa que no me cuadraba, os achents forestals son funzionarios y por o tanto tienen contrato fixo aiga o no aiga más o menos treballo. Por supuesto, l’autor d’ista canallada no estió pas un achent forestal, estió un ombre que treballaba como peón forestal, no pas como achent forestal. Pero o mal ya yera feito, y asinas se ha feito que a chent pensase que os Achents forestals estasen piromanos y que os buenezicos d’os militars eban de ir ascape a amortar o fuego………

Escribo isto ta prebar de dinnificar una mica o treballo de totz os que fan posible a preserbazión d’os nuestros monts encara que os meyos se miren d’estriboquiar l’opinión publica.

A Vulcanalia, Remeranza d'a luita d'una zibilizazión

2008-08-21T23:28:00.005+02:00

Iste sabato 23 d’agosto, a Fundazión Segeda zilebra a fiesta d’a VII Vulcanalia, ye una baralla zeltibero-romana con antigas recreazions en o lugar de Mara an se troban os alleros d’a ziudat zeltibera de Segeda (Sekaiza). Ista fiesta, a Vulcanalia gosa zilebrar-se o cabo de semana más amanau ao 23 d’agosto, diya de Vulcano en a epoca romana.

Os romanos firmón un tratau con os sechedenses por o que os romanos no atacaban a suya ziudat pero os sechedenses no podeban creyar nuevas murallas. Os sechedenses no’n creyón garra nueba pero adrezón as biellas. Iste estió bisto como una prebocazión y os romans les declarón a guerra y ta ello cambeón o inizio d’o calendario a o 1 de chinero, si no serían plegaus en agüerro y o periglo d’a fredor que ixo conleba.
En iste diya, rezenta l’istoriador Apiano que en l’añada 153 a.c tenió lugar a primera baralla entre o exerzito romano ao mando de Nobilior composau por 30.000 ombres y o exerzito zeltibero de segedenses y numantinos ao mando de Caro de Segeda (Iste ye o primer nombre documentau en as tierras d'o que güe ye Aragón), con 25.000 ombres. O resultau d’ista primera baralla estió a favor d’os zeltiberos, morión 6.000 romanos y dend’alabetz Roma declaró iste diya como nefasto.

Belatros istoriadors d’a epoca recullón iste feito en o suyos relatos:
“En reyalidat, en garra guerra bi habió tan inchusta causa. Os segedenses eban aculliu a os suyos aliaus y parients que eban fuyiu d’as guerras cuentra os romans. Entrezedión por els, pero ta cosa. Encara que s’eban absteniu de dentrar en a guerra, les obligón, como condzión ta un pauto en regla, a entregar as armas, feito que estió entendiu por os barbaros como si les obligasen a tallar-se as mans. Asinas que pillón as armas baxo o mando d’o suyo valeroso chefe
Megaravico”. (Lucio Aneo Floro, Epítome d’aa Istoria de Roma I 34, 3-4)

“Pues feitos a luitar con os griegos e ilirios, mai no eban bisto dic’alabetz que nafras de pica y de saeta, raras begadas de lanza, pero en beyer os cuerpos espiazaus por a espada ispana, brazos tallaus d’o güembro, capezas separadas d’o cuerpo, truncada del tot a cerviz, coradas ao descubierto y toda menas de fierizas nafras, aterraus se demandaban cuentra qué armas y cuentra qué ombres eban de luitar.” (Livio 31, 34,4)

Ta zilebrar iste diya se ferán toda mena de autibidatz, como mercadillos artesanals, una recreyazión d’a luita, etc. Tot lo podetz trobar en istas pachinas:
http://www.segeda.net/http://www.losceltiberos.es/

As perseidas

2008-08-11T23:58:00.003+02:00

Istas nueitz podremos desfrutar de un espeutaclo no guaire común pero que en istos diyas se dixa beyer si as boiras nos dixan, son as Perseidas u Glarimas de Sant Lorenzo.

Istas Perseidas son una plebia de meteoros de alta autibidat, ye dezir, que tienen un chicot periodo d’autibidat pero prou intenso. Iste periodo comenzipió o 17 de chulio y rematará o 24 d’agosto. Manimenos a suya autibidat ye maxima os diyas 12 y 13 d’agosto.

O suyo orichen ye un un cometa, o 109P/Swift-Tuttle, que poseye 9,7 Km de largaria y a suya orbita arredol d’o Sol dura bellas 135 añadas. En ista orbita, o meteorito ba gastando-se china chano dixando dezaga una racada de partículas en o espazio. En que a Tierra pasa por ista racada todas as añadas en a suya orbita, as partículas s’enfrontinan contra l’atmosfera y por a friczión d’ista s’escalfan y se creman produzindo una racada de luz que ye o que nusatros beyemos.

O suyo nombre ye debiu a que ta beyer istas Perseidas cal mirar ent’a constelazión de Perseo (ent’o Norte) Debiu a este feito, dend’o emisferio Sur no se puede beyer.

Asinas que si podetz beyer-las no os las perdatz. Ta beyer-las millor cal estar lexos d’a luz (cosa asabelo difizil en as ziudatz) y no tos ne faigatz si pasan 5 menutos sin beyer-ne garra. Gosan beyer-se una cada 2 menutos alto u baxo.

Cabo d'año de Fendo huellos

2008-08-02T23:45:00.003+02:00

Güe Fendo huellos y Blufi somos de zilebrazión. Güe cumplimos una añico de bida, ¡o nuestro primer cabo d’año!. Una añada en a que hemos charrau sobre espezies menazadas, biodiberdidat en cheneral, cheolochía y ecolochía, cambeo climatico y mesmo nos hemos atribiu con l’istoria. Pero d’o que más argüelloso soi ye que he escrito d’o que más goyo me ha feito y que muita chent me ha apoyau en tot. Ixas presonas que me aduyón a fer o blog, que me dión informazión y totz os que bi sotz dentraus y que etz quiesto amillorar y fer más gran iste blog con os buestros comentarios. Más de 4000 besitas de tot o mundo (encara que a mayoría de foranos aiga estau por casualidat via google, no sapetz as barbaridatz que a chent se mira por o rete…)

Mersi ta totz por estar-ie, por os buestros comentarios y o buestro emparo sin o que yo no ese teniu os animos ta continar. A berdat que en comenzipiar fa una añada no sabeba guaire bien qué esdebenir tendría iste blog, mesmo dandalié un poquet sobre a tematica, pero en beyer como yera iste mundo d’a fablogsfera y d’a blogsfera en cheneral me animé a escribir más.

Aspero continar a o menos una añada más en a que continaré amenistando d’os animos que m’etz daus.

Mersi y aspero que continemos fendo huellos como os que hemos feitos dica güe.

A Vella pseudocytisus sub. paui. O crujiente

2008-07-24T20:55:00.001+02:00

O crujiente (Vella pseudocytisus subsp. paui) ye una planta endemica aragonesa que creixe en puestos de clima continental d’o sur de Tergüel: val de l’Alfambra y val d’a Turia. Amás tamién se zitó en a Comunidat de Calatayut dica 1927. Dend’alabetz no se’n ha trobada garra en ista tierra encara que agora se siga mirando de reintroducir-la-ie. Existe atra subespezie, a Vella pseudocytisus sub. pseudocitysus que tamién se troba en istos puestos y en o sur d’a peninsuba Iberica, encara que zaguers estudeos amostran que as poblazións d’Aragón y d’o sur d’a península son subespecies diferents.

Ye una mata que plega dic’o metro d’altaria, con fuellas carnosas y abondants flors amariellas. Perteneix a la familia d’as cruziferas (que tienen 4 petalos en forma de cruz). As cruziferas leñosas son cuasi todas asiáticas, mientres que as europeas gosan estar erbaceas. Ista ye una d’as pocas cruziferas leñosas d’europa y que remeran a relación d’a flora ibérica con a d’as artigas asiaticas de fa 6 millons d’añadas.

Creixe en ripas con salagón y cheso, fundos de clamors, en os cantos d’os camins, carreteras y cautibos. O suyo mayor periglo ye a suya plega ta compustible, obras en carreteras, roturazións ta cautivos y pastoreo excesibo. Ye catalogada como espezie en periglo d’extinzión en Aragón

Encuesta

2008-07-24T19:35:00.002+02:00

Ya fa bellas semanas que remató o plazo ta risponder a l'encuesta sobre cómo amillorar iste blog. Primero de tot agradixer que aigatz dau a buestra opinión, encara que aigatz estau menos que no os que yo asperaba. Pero como diz o Gran Wyoming "O que España bota, ba a misa" y en iste caso o que abetz botau ye que iste blog amenista: charrar más sobre ESPEZIES PROTECHIDAS y zentrar-se más que más en ARAGÓN.

Prebaré de fer reyalidat os buestros suenios encara que a naturaleza no entienda de leis de proteuzión ni de mugas administratibas. De todas trazas iste blog ye abierto a cualsiquier sucherenzia.

Grazias por tot y que baiga bueno.

A biola d'o Moncayo

2008-07-06T18:38:00.002+02:00

Ista semana zaguera, tenié o gusto de fer un curset de botanica en O Moncayo, tot un paradiso t’os que aman ista polida zienzia. Estar dentro de ixos fabars y rebollars me parexió estar en atro mundo comparando-los con as selbas de pino carrasco y os acampos de carrascas a os que soi feito.
En puyar ao Collado Bellido me trobé con una d’as mas polidas flors que he bisto, ye a Biola d’o Moncayo (Viola montcaunica), una planteta que encara que siga prou común en iste puesto ye un endemismo d’o Sistema Iberico. Manimenos pareix que no tien garra figura de proteuzión (u os “forestals” (APNs millor dito) no me lo querión dizir o no lo sabeban, que tot puede estar)
Con ista plantica tan esconoxida (no bi’n ha garra en o rete si tos ne miratz) me fería goyo de comenzipiar a charrar d’espezies endemicas d’o Sistema Iberico, que bi ha ta escribir-ne y no rematar-ne .

L'ibis eremita, encara bi ha un filo d'asperanza.

2008-06-23T00:01:00.004+02:00

Dimpués d'os desamens, Fendo huellos torna a l'enrestida con o mesmo de cutio (dica que l'encuesta que he penchada a man dreita en o sidebar diga o contrario) y mirando-se de amillorar a calidat dimpués d'iste mes. Agradeixemos a Fufi que aiga puesto enantar con o suyo grandismo poder a fin d'os desamens a o 12 de Chuño (en o mío caso) asinas podremos comenzipiar antis con antis a fer huellos.

En güellando o 20menutos bel d'istos diyas me trobé con una chicorrona notizieta que me truncó o ficazio y prou que no he dandaliau en mirar-me-ne más informazión.

"L'ibis eremita -Geronicus eremita-, abe cuasi extinta logra reproduzir-se en libertat."

L'ibis ye un muxonet con només de 250 exemplars en tot o mundo. De bels 80 zm d'altaria y 1,5Kg de peso ye un abe que tradizionalment ha habitau a zona d'o Mediterraneo. As unicas poblazión salbachinas que restan güe se troban en Marruecos y Siria. Abita en puestos aridos u semiaridos d’artigas y campos de cautibo.

Debiu a os pestizidas, l’agricultura intensiva, a man de l’ombre y l’alticamada d’o suyo habitat ha prebocau que a suya población baixase graument dica dentrar en a lista d’abes en periglo d’extinzión. Güe, només en quedan bels 250 exemplars.
A buena notizia ye que dimpués de 500 añadas se ha puesto reproduzir en España grazias a o “Proyeuto Eremita” desembolicau en o Zoo de Xerez d’a muga. Ha estau un proyeuto prou difizil ya que ista abe amenista d’atra abe ta aprender. Si se esen dixadas en libertat no esen puesto sobrebibir. Con iste proyeuto se miró de fer serbir “pais afillaus” . En naixer, os ibis se fan a o que beyen, alabetz ixas presonas esfrezadas d’ibis les amostran a alimentar-se. China chana se leban a un campo d’entrenamient an se contina con l’amostranza dica que no amenistan de l’aduya d’o ser umano ta sobrebibir.

Diya d'o meyo ambient.

2008-06-05T21:19:00.006+02:00

Güe 5 de Chuño ye o diya d'o Meyoambient.

No cal que faiga garra descurso ambientalista ya que en iste blog ixo estaría una redundanzia. Tampoco no tiengo tiempo ta fer-ne. Mai tierra me clama a l'estudeo.

T'os que sotz afincando os acons, muita suerte! Només manca un chicorrón empentón!!!

Astí tos dixo con ista foto. Isto ye o que acayece cuan un río saca as suyas escrituras y demanda o que d'el ye. A naturaleza se dixa sentir y l'ombre beyer, ascuitar y callar. (U fa fotos ta remerar-lo, como yo)

Ye prou refitolero, que a fiesta de l'augua s'engarone...

A proposito. Encara soi asperando bella respuesta a o crebatozuelos que tos he dixau aquí baixo, sobre as planarias.

Tamién me fería asabelo goyo que rispondesetz a l'encuesta que ye dende fa bel par de semanas aquí a man dreita. Podetz eslexir más d'una rispuesta. Encara manca una semana y meya ta que remate o plazo.Grazias!

As planarias. O expedient X d'a transmisión d'informazión.

2008-05-26T00:48:00.005+02:00

Astí baixo tos dixo con un crebatozuelos, que dende que me lo dizión no he puesto dar-le garra soluzión. Asinas que os que sepatz de biolochía y etolochía escurruchatz-tos o zelebro a beyer si podetz trobar bella ideya.

L'istoria trata sobre una preba que se fazió con planarias (que son anelidos acuaticos). Istos animaletz son fotofobos, ye dezir, que les cuaca más que más d'estar en a escuridat. Manimenos cuan les das alimento en un puesto con luz, istas comenzipian a trafegar a zerina y ban t'a istos puestos con luz, alabetz cuan ya han aprendiu que a luz les trayeba comida, en que bi ha luz as planarias s'acapizan sobre ista.
A istas planarias les ne dan ta michar d'atras planarias muertas, criadas exclusivament ta ista funzión alimentizia. Pero una begada, os zientificos s'entibocón y matón a un grupo de planarias biellas que ya eban estau somisas a la preba, ta alimentar a bellas planarias chobens que encara no i eban estau somisas.
A l'atro'l diya cuan os zientificos iban a comenzipiar a preba con ixas planarias chobens se lebón una gran percutida ya que ixas planarias en que beyón a luz, i corrión ascape ta pillar a suya comida, cosa que yera imposible ya que ista yera a primera begada que istas planarias yeran somisas ta la preba y encara no eban puesto asoziar a luz a la comida.

¿Puestar que istas planarias aigan obteniu l'informazión debiu a que eban minchau planarias biellas que eban estau somisas a la preba?
¿Cómo ye posible a trasmisión d'ista mena d'informazión a trabiés de una cadena trofica?
¿Ye posible que l'informazión d'a experienzia mientres a bida se alze en garra estructura como en forma de ARN u proteína?
¿No sería lamarkista pensar que ista mena de informazión pueda transmitir-se?
Si tos etz quedau O_O "fendo güellos" (jajaja) sapetz que no sotz os unicos porque yo tamién m'en quedé.
Cualsiquier ideya u comentario dixatz-me-lo aquí. A beyer si belún troba a soluzión.

L'onso polar. Espezie protexida en os Estatos Chunius

2008-05-17T01:16:00.004+02:00

De cabo ta cuan me trobo con notizias con as que no sé si reyir u plorar. Ixas notizias que te dixan a metat, que se desdizen y que mezclan a politica con tot, y tan ricament que lo fan, como si lo fesen totz os diyas. No quiero dezir que os periodistas faigan mal o suyo treballo sino que pareix que cuan trobas bella notizia tamién puedes trobar-te-ne a contraria. Y que as cosas només se faigan cuan os políticos quieren sin ascuitar a os que saben d'o tema.

Ista notizia que he trobada ye que o Gubierno d’os Estatos Chunius d’America plega de declarar a l’onso polar espezie protexida dimpués de añadas y añadas de que os zientificos le’n demandasen. ¡¡Miraglo!! Pareix que bella luzezeta se ye alumbrada en a capeza d’istos esmos-pensants. Plegan de beyer que cal fer bella cosa si queremos que os onsos no disparixen d’o planeta. Pues bueno, con ixo nos hemos quedau. No se diz qué se ferá, ni as leis que feran serbir, ni zarrapita ni pon! Encara que me aiga mirau en o rete bella cosa, no’n he trobau garra. Només se diz que en as zaguers setantaizinco añadas o ran d’o chelo en o Artico ha baixau a fote, y encara contina achiquindo-se ascape y que en l’autualidat bi ha bels 20.000 onsos polars en o Artico y que 2/3 podrían disparixen en zincuanta añadas. Pero d’as midas que ban a prener, cosa.

Dimpués plegan os “zientificos barrenaus” que se i oposan por istos motibos:
-Nomás se ha teniu en cuenta os pronosticos metereolochicos ta fer ista declarazión.

-Isto nomás se fa serbir ta creyar alarmismo ya que o numero d’exemplars ye creixendo...¿? (¿no plegan de dezir que ye baixando dende fa 75 añadas?)

-Si només se mira de protexer os onsos por l’aumento d’a temperatura se ye cayindo en una error ya que as temperaturas serán más fredas en as proximas diez añadas (Será isto d’o qu'en charré, d’a ibernazión solar)

Puestar que istos zientificos no sigan tan “barrenaus” y tengan una mica de razón ya que no solo ye disparixendo l’onso debiu a l’aumento d’a temperatura y por lo tanto por a disparixión d’o suyo habitat, sino tamién por atros motibos, como ye a caza indiscriminada, l’alticamada d’o suyo habitat…

Pero o millor ye cuan apareix un siñor d’istos que pasan a suya bida fendo leisy botando-las y diz:
-Si a Tierra ye escalfando-se dende fa 100.000 añadas y encara no han dispareixiu, agora no ban a fer-lo! (¿?¿?¿?)

Sincusatz-me por o mío pesimismo, pero ye que cuan trobas notizias d’ista mena no sé qu’en dezir. Alabetz no sé si tot o que he dito ye reyal o no’n ye. Si en sapetz bella cosa, dixatz-me bel comentario. Mesmo puede que en que sepa más, en escribiré atra begada.

Aznalcollar. 10 añadas dimpués.

2008-04-26T21:48:00.002+02:00

Ayere se cumplión 10 añadas d’o bertiu tosico que menazó Doñana. A trencadura d’a basa d’a mina d’Aznalcóllar prebocó una tamborinada tosica de 6 millons de metros cubicos de repuis.6.000Hc d’o río Guadiamar quedión arrasadas dica que se logró aturar l’abanze en as puertas d’as marismas de Doñana. Diez añadas dimpués ixos puestos han floreixiu grazias a 300millons d’€.

Mientres dos diyas, a chen d’o lugar, os campesins, voluntarios, etc consiguión aturar prou luego ixa mareya negra con malacóns. Dimpués, mientres as dos añadas beniénts se fazión os treballos d’adrezadeta. Se consiguió redorar o 99% d’os contaminants. Como yera de dar, as autbidatz agrícola y ganadera se biedón y ixos terrens se allenón ta la suya rexenerazión. Ixa zona se combirtió en un corredor ecolochico que trabesa a probinzia de Sebilla y enrastra Sierra Morena con Doñana y que amillora a biodibersidat en ista zona.

Manimenos bi ha bels puntos sin rematar ya que a nueva bechetazión encara no se ye coneutada con a selba de Doñana y os berdaders ocupants d’a compleganza d’o rio no son os animals sinos os quads.

Dimpués de todas istas añada se puede decir que que se i ha feito un buen treballo de esbielladura. Mesmo bi ha chen que afirma que a zona ye millor que no antis d’o bertiu.

22 d'abril. Diya d'a Tierra

2008-04-22T22:00:00.006+02:00

Güe ,como totz os 22 d'abril dende fa cuasi cuaranta añadas, se zilebra o diya d'a Tierra. O 22 d'abril de 1970 estió uno d'os primers trancos que a soziedat comenzipió a puyar en fabor de nuestra mai Tierra. Más de 20 millons de presonas se chuntón y establión collas y plataformas ta espardir y discutar sobre o meyo ambient.

Manimenos no güaire presonas u sectors d'a poblazion conoixen iste diya. Garra autibidat, ni charrada nian garra chicorrona notizieta en o periodico.

Aqui dixo a mía umilde aportazión. Ta que os que sotz dedicando bels menutos a beyer iste blog, sepatz que güe, y aspero que totz os 22 d'abril, ye o diya d'a tierra.

"Nomás dimpués de que o zaguer árbol siga tallau,
nomás dimpués de que o zaguer río siga emberenau,
nomás dimpués de que o zaguer peix siga apercazau,
nomás alabetz sabrás que os diners no se pueden minchar." Mazada india

"Ta que rispeten A Tierra, cuénta-les que contiene l'alma d'os nuestros debampasaus.

Amostratz a os buestros fillos o que nusatros amostramos a os nuestos, que A Tierra ye nuestra mai.

O que acayece en A Tierra tamién le acayece a os fillos d'A Tierra.

Cuan os ombres escopen en A Tierra se son escupindo a els mesmos.

Pues nusatros sabemos que A Tierra no perteneix a os ombres, os ombres perteneixen a La Tierra."

Mensache del Gran Chefe Seattle a o President d'os Estatos Chunitos. 1855

Zentenars d'animals mueren afogaus cada añada en una canal en Palenzia

2008-04-18T10:15:00.004+02:00

Iste maitín como totz os diyas pillo o 20menutos en ir t'a clase. De cabo ta cuan bi ha bella notizia que truca o ficazio como una que he trobada iste maitín. 300 cuerzos y gran cantidat d'atros animals como chebalíns, lopos, etc mueren afogaus en una canal que Iberdrola poseye en o norte de Palenzia. A imachen que apareix en o cobalto d'a notizia lo diz tot; una uzena de cuerzos muertos que plegan de quitar d'a canal ficaus en un contenedor de basuera.

Pareix que ixa canal ye un puesto an os animals gosan ir a beber sin saber que ye una trampa mortal ta els. Ye rodiada d'una clena prou baixa alabetz os animals no troban garra problema ta blincar-la. O problema ye que ta beber l'augua cal baixar una ripa muit pingada, l'animal caye en l'augua, y no puede tornar a puyar por a ripa debiu a l'altaria, por o que tien una cruel angunia ya que en prebar-ne se raden as garras y mueren cansos.

Iberdrola amilloró as clenas dando-les más altaria, pero pareix que con ixo no bi'n ha prou y zentenars d'animals continan afogando-se-ie.

De casos como iste bi'n ha por totz os puestos. En o mío lugar raro ye o mes en que no mueren 2 güeitres eleutrocutaus ya que as torretas eleutricas no poseyen os sistemas que se amenistan ta que as abes no s'eleutrocuten. A yo mesmo me ha pertocau de ficar-los en una bolsa de basuera y lebar-los a os albeitars ta que les faigan a necropsia. ¿Y sabetz que se fa ta saluzionar-lo? Ni zarrapita ni pon. Se fa una entimadura a ERZ que la bosa sin garra problema ya que ta ista empresa ye más barato pagar l'entimadura que no meter os sistemas antieleutrocuzión.

A la fin tot se resume con diners. O barato ye bueno, o caro no'n ye. A bida en sí no importa

Por zierto, ya que charro d'iste afer tos dixo atra notizia sobre unos desalmaus que les cuacaba maltratar a mixins y dimpués en feban fotos. Manimenos pertenixeban a un grupo politico y mesmo uno s'eba presentau a las eleuzións municipals en Talabera d'a reina. Se suposa que istas presonas han de representar-nos u gubernar-nos.

http://www.20minutos.es/noticia/355118/0/expulsados/pp/maltrato/

Sin parolas...

Canadá premite a matanzia de 275.000 focas

2008-04-02T23:24:00.002+02:00

Atra begada, como todas as añadas hemos de beyer con enrabia y incortadura ixas imachens prozedens de Groenlandia y d’a peninsula d’o Labrador en as que mils y mils de focas son enrestidas, asesinadas y espelletadas ,muitas (u cuasi a mayoría) en son mesmo antis de no estar muertas. Chemecos que demandan aduya y mesmo plegan en l'esmo y que només son callaus por un tucazo mortal acompañau por rios royos de sangre sobre un mar blanco de nieu, dimpués so que silenzio y asinas zientos de miles de begadas en bel par de diyas.

Ista añada 275.000 focas de dende doze diyas dica doze meses serán asesinadas, no porque en i aiga misiadas y sigan un periglo t’o buen desembolique d’os ecosistemas a os que perteneix ista espezie, sino que en ista se son trobadas bellas fuens de riqueza (economica només). O suyo pelello se fa serbir ta la pelletería, a suya graxa ta “merezinas” y cosméticos y o suyo pene ta la cozina asiatica (sin comentarios)
O menisterio de pesca y ozians afirma que a muerte les ne será dada d’una traza “umanitaria”:Primero les trucan con una barra si son crías si no les fincan un pico en o cuello. Tamién se fa serbir o hakapik, que ye un palo feito de fusta con una punza en una estrimera y una garrancha. Se compreba si l’animal ye muerto, ta ixo os cazataires son “obligaus” a comprobar o reflexo corneal (os güellos).Dimpues de tot isto l’animal puede estar espelletau.En l’añada 2001 os albeitars que estión conbidaus a o siguimient concluyon que as leis canadiendes sobre bienestar animals yeran estando bulneradas y que en o 40% d’os casos as focas yeran espelletadas estando encara consziens.
¿Qué se puede fer ta que ista barbarie remate ya? Os nuestros representants (o gubierno) no’n diz cosa. Puestar que tiengan zerina de que o gubierno de Canadá les responda que primero España debería fer-se-ne por as suyas propias matanzias, que aquí son bistas como cultura. Isto ye un problema de totz, porque os diners se quedan en as pochas canadienses manimenos as consecuenzias las penaremos totz.

X chornadas aragonesas de paleontolochía

2008-03-23T21:19:00.008+01:00

Os diyas 11, 12 y 13 d'abril son os diyas eslexius por l'asoziazión cultural "Bajo Jalón" ta zelebrar as X Chornadas aragonesas de paleontolochía en a Billa de Ricla.
A tematica d'istas chornadas será a bida en o Terziario. Dende que un meteorito s'enfrontinó contra la Tierra (y mató os dinosaurios) dica la aparixión d'o ser umano. (65-1,7 millons d'años)
As chornadas se composan de bellas charradas sobre iste tema, mesas redondas, besitas a una exposizión d'o ser umano y una excusión a Ambrona y Medinazeli.
Ta ir-ie y tornar-ne bi ha buses totz os diyas dende Zaragoza, pero si queretz podretz acampar en o polideportibo y en as piszinas de Ricla.

Si queretz encara podetz conduzir-tos-ie en http://jornadaspaleoricla.spaces.live.com/ U si simplement queretz saber-ne más tamién podetz besitar ista pachina.

Segeda, a ziudat zeltiberica que cambeó o calendario

2008-03-16T01:06:00.013+01:00

Güe 15 de marzo se ye zelebrando en o lugar de Mara os Idus de Marzo, calendata en a que os romans zelebraban l’año nuebo antis de trobar-se con os Segedenses, que les obligón a cambear o comezipio de l’año dic’o 1 de chinero. Calendata que se ye conserbada dica os nuestros diyas.

Entre Mara y Belmont de Gracián se troban as ruinas d’o que estió a capital d’a tribu zeltibera d’os Belos, Segeda (Sekaida).

Mientres a conquista d’os romans d’a peninsula iberica, istos pautón con os belos que els no les ferían a guerra pero que os belos no deberían de aumentar as suyas murallas ni creyar nuebas ziudatz y deberían gosar-les bel tributo. Os belos no creyón garra nueba ziudat, pero en ixas añadas Segeda crexió grazias a os pequeños lugarons d’a redolada que sintiendo-se más seguros se i cubillón y creyón una gran ziudat. Tampoco no aumentón de grandaria as murallas sino que adrezón as que teneban biellas y las fortificón. Isto estió bisto como una prebocazión por Roma que en 153AdC declaró atra guerra contra os ispanos debiu a iste feito.
En os Idus de Marzo se eslexiban os consules y se aprestaban ta fer a guerra. Pero como si esen partiu ta Segeda en marzo, estarían plegaus en Segeda en agüerro, obligando-les a fer a guerra d’ibierno. Sabiendo que l’ibierno en istas tierras d’o interior yera muito duro, dezidión d’enantar o comenzipio de l’añada a las Calendatras de chinero (1 de Enero) Ta prebar de fer a guerra de berano y tamién ta dar-les una “percutida” a os segedenses.
Os Belos se chuntón con os Arebacos, atra tribu zeltibera con capital en Numanzia, en una guerra contra os románs, que tras bellas redotas romanas, cayón baixo o poder d’os latinos. (En una d’istas barallas os romans i lebón elefans. Prexinatz os zeltiberos que nunca no’n eban bisto garra. Pues un elefán recibió un cantazo en o güello, se tornó barrenau y comenzipió a enrestir a os propios romans. Beyendo isto a resta d’os elefans, se sintión nierbudos y fazión o mesmo.)
Ya charraré un poquet más d’os zeltibers y d’ista guerra cuan tienga tiempo (y en sepa un poquet más, a istoria no ye o mío)
Sincusatz-me por aber escrito isto chusto o diya en que s celebraba. Pero a yo mesmo me ha “apercazau o toro” porque me pensaba que iba a celebrar-se más tardi. Ya me ese cuacau ir-ie.
Ta saber-ne más:
http://www.segeda.net/
http://www.educa.aragob.es/cprcalat/segeda/

A ibernazión solar. O nuebo reto d'o cambeo climatico.

2008-03-01T18:22:00.016+01:00

Iste tema d’o que tos boi a charrar ya ye una miqueta “trillau” pero boi a dar-le un sentiu prou diferent a o que gosamos ascuitar en os meyos.

Totz saben qué ye o cambeo climatico. Que cada añada plebe menos y fa más calor. Que os chelegars se son regalando, que as zigoñas no tornan ta San Blas ya que no se’n ban d’ibierno y asinas asinas…Mesmo fa bels meses aparixión bellas imachens, una d’elas yera una imachen autual de l’Ebro en pasar por Zaragoza, y l’atra, a mesma imachen pero con un Ebro xuto, sin augua, ni Expo nian barcas ta paseyar-se.

Pues parix que isto podría cambear de raso d’aquí a bellas añadas y que o Ebro no será un río xuto sino una pista d’esquí (y no quiero dar ideyas). Eszeuto que agora bienga o primo de Rajoy y diga o contrario, u a mia profesora de cheolochía alazetal, que en ye fan (u afiliada más bien). Agora diretz, ya lo sabeba, isto ye d’o que charran bels zientificos que dizen que o “zincho climatico” (¿se diz asinas?) que fa que a calor de l’oceano en l’ecuador puye ta istas tierras escalfando-las se crebe y no plegue dica Europa. Pues no, no en ye asinas.

Tot isto ye debiu a que l’autibidat d’a superfizie solar ha baixau notablement y isto embrecará a baixada d’as temperaturas en a Tierra. Iste feito, que ha estau clamau “ziclo solar 25”, podría comenzipiar en o 2022 y imbrincará uno d’os periodos d’autibidat solar más baixos en sieglos.

Tamién clamau “ibernazión solar” podría plegar dimpués de añadas calorosas y cayer as temperaturas ascape en un par d’años.

Encara que parixca rarizo isto ha pasau muitas begadas en o zaguer milenio: Os umans plegón en America per o estreito de Berin mientres una glaziazión que cheló as auguas que trestallan Asia d’America. Una puyada d’a temperatura de l’oceano premitió a os biquingos de plegar en a peninsula d’o Labrador muitos sieglos antis de que Colón plegase en San Salvador. En o clamau Minimo Spörer (1420-1570) o Ebro se chelaba chunto a o mar y en abiento de 1506 a chen lo pasaba a pié en Tortosa. En o Minimo Maunder (1645-1715) se beyón icebergs en as Insas Balears a primera semana de 1695. O Tamesis gosaba chelase tamién d’ibierno dic’o sieglo XVIII.

Istas "pequeñas glaziazións” u “ice-ages” han estau presents en o planeta sin que o ser umano en aiga estau o culpable.Isto no quiere dizir que os chelegars pleguen dic’os Pirineus, que d’estiu estiemos a 0ºC. Ixo només son falordias tipicas d’una pelicula americana (O diya de maitín) No cal que baixe a temperatura garra ta que un río se chele. O Duero se ye chelau iste ibierno en pasar Soria (tamién ye berdat que o Duero ye más chico en pasar Soria que no l’Ebro en pasar Tortosa)

Asperemos que isto no siga tan aparatero como se diz y si en beras ocurre asperemos que no i siga plegau bel “saputo” d’istos que bi ha agora y nos faiga una pista de patinache en o Ebro.

A Biola de Cazorla

2008-02-24T01:08:00.003+01:00

Ya fa muitos meses dende la zaguera begada que charré d’o reino bechetal. Puestar que siga que as plantas, en parixer sers inferiors, no remanen tanto en a nuestra recordanza como os animals. Manimenos a botánica ye una zienzia apasionant con a que puetz pasar un buen inte leyindo una guía botanica, indo t’o campo ta beyer y esferenziar espezies, fer un erbario y mesmo ta bel enfortunau ganar-se a vida.

A zaguera begada que en charré estió d’o jopillo, pensando en bella espezie d’a redolaza de Gallocanta por demanda de un colega que ye d’astí. Ista begada m’en baixaré un poquet más, dic’o Sistema Betico an abita una chicorrona planteta clamada Biola de Cazorla, d’a que he d’almitir que no’n sabeba garra dica que o mio buen amigo Chabi m’en charró en una d’as nuestras largas charradas de natura. Alabetz me parixió que yera una espezie dinna d’estar nombrada en iste blog. Fa duelo que por istas tierras nuestras no bi’n aiga.

A Biola de Cazorla, Viola cazorlensis ye una planta perenne de bels 10 zm d’altaria, con fuellas lineares u lanzeolatas de color berda escura. Con tallos florals de bels 20zm y flors hermafroditas con 5 petalos rosaus-biolazeos y de diferent amplaria. As flors poseyen un pedunculo rosau de dica 6 zm. A florazión ye dende abril dica chunio.
Ista planta comenzipia a crexer en comenzipiar a primabera y os fruitos se desembolican mientres mayo y chunio y a diseminazión d’a simién ye en chunio y chulio. O suyo fruto ye una capsula y as simiens son marrons claros de 2,5 mm.
Os exemplars que abitan chunto a atras espezies gosan tener una millor reproduzión ya que no son minchadas tanto por os animals y o feito de estar más grans les premite produzir más flors, fruitos y simiéns.
A mayoría d’as plantas no se reproduzen todas as añadas. O suyo neutar ye acabalau en a estrimera d’o largo espolón an que només puede plegar un inseuto, exautament una quera diurna, o Macroglossum stellatarum.

HABITAT
Ista espezie bechetal ye endemica d’a peninsula iberica, només se troba en o Parque Natural de Cazorla, Segura y Las Villas en Chaén, encara que tamién se troba en a Sierra de Mágina y más escasa en a Sierra de Castril en Granada, Sierra d’Alcaraz en Albazete y Mojantes en Murzia. Gosa bibir entre cantals u en o solero rodiada d’atos exemplars u atras especies.

PROTEUZIÓN
A curto plazo no bi ha garra enchaquia de trestuque ta la suya superbibenzia, encara que podría disparixer en os puestos an que ye esposada a l’auzión de mamifers erbiboros y a l’alticamada d’o suyo habitat.
Catalogada como espezie en periglo d’extinzión por a Chunta d’Andaluzía, nafrable por a Chunta de Castiella La Mancha, a UICN (Chunión mundial ta la natura) y por a Rechión de Murzia.

L'alica perdiguera

2008-02-16T00:51:00.010+01:00

L’alica perdiguera, Hieraaetus fasciatus, ye una abe garrapiña tipica d’os paisaches mediterranios, a suya poblazión ha penau una baxada dend’as zagueras decadas.
Ye una alica que mesura bels 1,50 m. d’embergadura. A color d’o suyo cuerpo ye muit clara pero destacando sobre ella bellas alas escuras.
Encara que por o suyo nombre se supose que minche perdiganas, només representan o 10% d’a suya alimentazión. Tamién s’alimenta de coniellos, zorzes, palomas, corbasos, mesmo picarazas y atrás abes como os garrapescaires.

HABITAT
Ista espezie abita en as tierras d’a redolada mediterránea más que más, sobre ¾ d’a suya poblazión mundial ye en a peninsula iberica. Gosa fer o niedo en cantals u en arbols con materials como brancas y fuellas en o suyo interior. A niedada gosa estar de bels dos güegos blancos.

MENAZAS
As suyas prenzipals menazas son:
-Os cordons eleutricos (a metat d’os aczidens s’i deben),

-A manca d’as suyas “tipicas” presas que fan que as crietas no contien entabán y que preben de cazar atras abes como as picarazas (cualsiquier que’n aiga bista garra sabrá que as picarazas son se dixarían pillar tan facilment)

-Disparos y solimáns. (Cada begada menos)

-L’alticamada d’o suyo habitat.

En només 10 añadas han disparixiu más de 10 parellas d’alicas perdigueras. Actualment bi’n ha 31 en Aragón y bellas 750 en a resta d’Espanya.

PROTEUZIÓN
L’alica perdiguera tien en Aragón l’estatus de “espezie en periglo d’estinzión”

Primero ta conoixer o suyo comportamien, istas abes han estau siñaladas con rezeutors GPS (encara que a begadas se trafeguen y no se puedan trobar…) Con iste sistema se puede otener datos sobre esplazamiéns, aria d’influyenzia, superbibenzia, etc…
Se han preniu atrás midas sobre o suyo habitat como:

-Faborexer l’aumento d’a poblazión de coniellos y de perdiganas o a suya chestazión zinechetica, creyazión de bibars (cados artifizials).

-Milloras en os tendius eleutricos, que son a suya prenzipal menaza.

-Zebando-las con presas muertas (encara que seguntes muitos forestals no ye bueno ta istas abes ya que pueden fer-se-ie)

Un meteorito raspia a Tierra

2008-01-29T10:48:00.001+01:00

Güe me soi debantau ¡bien, güe ye fiesta, pero a yo rai, he d'estudear!. Enchego a radio y entre notizias como la de ixe condutor que mató a un ziclista en A Rioxa en 2004, en salió inozén y agora demanda una indemnizazión ta adrezar os tucos d'o suyo auto, que si Zapatero y Rajoy y os suyos afers bafurosos.....Pero bi'n ha una que me tuca o ficazio: Güe a la meya t'as nueu (GMT) o meteorito 2007 TU24 de 150 metros d'amplaria plega de raspiar a Tierra. S'ha amanau dica una distanzia 1,4 a d'a Luna (538.000 Km). Informan que no ha habiu garra periglo t'a Tierra (uffffff, qué estreta se me eba ficada en o cuerpo). Només una begada cada zinco añadas un asteroide d'ista amplaria s'amana a la Tierra pero només impautan una cada 37.000 añadas. Amás no'n pasarán más d'ista amplaria u mayor dica 2027 (remeratz fa bellas 10 añadas cuan nos deziban que en ista añada un meteorito imprautaría en a Tierra y as TVs s'aplenon de peliculas como Deep Impact....)

A la fin dizen que iste meteorito podrá estar bisto dend'a Tierra por os afizionaus. Ascape m'acucuto por a finesta ta alufrar o zielo...... ¡Qué innorán!, si soi en Zaragoza y si de nueis no se beyen ni estrelas ni luzers....como ta poder beyer-se un meteorito de maitins.....Només beigo una capa de smog fotoquimico y en l'orizon se dixa beyer una mica d'o Moncayo con nieu en a suya tuca.

Que pasetz un goyoso San Valero y que "afinquetz os ancóns" si tenetz desamens.

A Tortuga de coscarana toba d'o Yangtsé. Copular u morir.

2008-01-11T19:20:00.000+01:00

A tortuga de coscarana toba d’o Yangtsé u tortuga de Shangai ye una d’as tortugas d’augua dulze más grans d’o mundo. Ye un reptil de 1 metro de largaria, 70zm d’amplaria, bels 130 Kg de peso y o morro pareixiu a o d’un tozín. Dica aquí tot pareix normal ta un quelonio como en ye iste, pero o que fa que o Rafetus swinhoei siga especial ye que no’n quedan más que 3 exemplars en o mundo; un masclo y una fembra en dos zoolochicos en China y atro masclo en Bietnam.
Iste animal abitaba en l'ibón Jiangsu en China, os cursos baixos d’os ríos Yangtsé y Honghe y o norte de Bietnam.Ista espezie estió en o sieglo XX bitima d’a cazata indiscriminada. A suya carne se feba serbir d’alimento, a suya coscarana y os suyos güesos t’a merezina tradizional y a suya capeza como trofeu.
Ta prebar de remeyar iste estau cretico, se prebará que dos d’istos exemplars copulen. Ta isto se chuntará a la fembra de más de 55 añadas, que encara mete güegos no fecundaus, y un masclo de más de 80 añadas, birchen como totz os suyos concheneres encara bibos (només en son 3 como eba dito). No se sabe garra d’a suya reproduczión. Puestar que si a copula contine enta debán, a fembra alze a babada d’os masclo bellas añadas ta empreñar os güegos. Si no, se prebará de fer-le una empreñada artifizial.
A fembra ye ibernando dica abril, ¡l’estreta que se lebará a pobreta cuan se dispierte!

O langostino, l’acotolador d’os manglars.

2007-12-30T20:21:00.000+01:00

En istas fiestas de Nadal, as mesas d’as nuestras casas s’aplenan de toda clase e manxars y ambrosías, turróns, ternasco, pabo, marisco… Pero o que no sabemos ye que mientres nusatros semos desfrutando-ne, muitas espezies y ecosistemas son disparixendo. Un exemplo ye a cría intensiba d’o langostino en manglars.
Os manglars son ecosistemas carateuristicos de puestos intermareals (entre o mar y a tierra) de clima tropical. Bi se troban gran numero d’espezies bechetals clamadas mangles, que se son adautadas a la salinidat y a la manca d’oxicheno en o suelo y a suya carauteristica prenzipal a la bista ye que poseye radizes aereas (como o panizo pero a gran escala).
Istos bosques poseyen una gran biodibersidat de bechetals, peixes, musclos, abes, etc que fan que istos ecosistemas sigan irremplazables. A suya gran biodibersidat ha premiso una economía de subsistenzia t’as comunidaz umanas costeras. Amás os manglars tienen bellas funcions muit importants ya que amás de poseyer una biodibersidat insustituyible, tamíen impide l’erosión d’a costa, retiene materials fertils, son os ecosistemas de mayor produzión de matiera organica y no cal decir que produze oxicheno.
Tot isto cambea en que se’n fa un uso inamparable. O suyo mayor periglo ye a cria de langostinos y camarons ya que ta instalar las piscinas de cría cal tallar grans amplarias arboladas. A isto cal adibir que ta la cria se fan serbir asabelos produtos químicos que contaminan l’augua, mesmo puede produzir eutrofizazión y hipernitrificazión.
En 1980 bi eba 17 millons d’ectarias de manglars en o mundo seguntes a FAO. Güe se’n son acotoladas más d’a metat.
Con isto no tos boi a dezir que istos diyas no minchez langostinos, ya que a yo mesmo me cuacan asabelo y prou que’n mincharé, puestar que atras añadas i piense antis. Simplement quereba truncar-tos o ficazio sobre a problemática d’a cria de muitas espezies destinadas a o consumo umano, que como en iste exemplo només se mata a la “pirina d’os güegos d’oro” que ye o planeta.
¡Buena añada 2008 ta toz!

Y dimpués d'a expo... ...Qué?

2007-12-11T23:53:00.000+01:00

Ayere, diya 10 tenié l’argüello d’estar una d’as no güaires presonas que asistión a una charrada sobre os efeutos meyoambientals d’a Egspo, que se fazió en a biblioteca María Moliner, en a Unibersidat de Zaragoza. He dito que teneba l’argüello d’estar una d’as poca presonas que bi estión perque gracias a la gran espardidura que s’en fazió, tot o mundo lo sabeba (Dimpués me dizen que malfurrio o mio tiempo leyendo os cartels que punchan en as parez…)
Javier Martínez Gil (Catedratico de Idrocheolochía d’a UZ), Antonio Casas (Profesor de Cheolochía d’a UZ) Néstor Giménez ( d’Ebronautas) Francisco Comín (d’o instituto pirenaico d’ecolochía) y José Luis Martínez (d’Ecolochistas en acción) nos amostrón bellas posibles repercusións y problemas que l’espo ZH2S tiene, más que más en o meyo ambién, encara que se charró tamién una mica de problemas economicos que l’espo carria d’os cuales no boi a escribir ya que amás de que en son muitos, como a economía no ye o mío no puedo charrar-ne con güaire seguridat. (Encara que no cal estar economista ta beyer que os pres son ya puyando cual torre de l’augua…)
Se tratón problemas como a manca de rigor en os proyeutos meyoambientals que se fazión, a cheolochía de Zaragoza y os suyos innumerables foraus (que coninarán aparixiendo, aiga un bosque, zemento o una canal d’auguas brabas), o problema de fer-lo ao costau d’o Ebro y os problemas d’infiltrazións d’auguas que carriará. A ideya d’as barcas que funcionan con luz solar (Qué ironía, con a enerchía que se fera serbir en a iluminazión d’a torre de l’augua, en a canal d’auguas brabras y en fabricar moñacos de flufi ...) Toz sabemos que poco esdebenir tien ixa ideya y que, como pasó en Salamanca con un caso parexiu, ixas barcas se ferían serbir al fin como prostíbulos flotans.
Ya nos caldría a toz tener un celebro cretico con tot o que nos rodia, que tiengamos unas ideyas propias y que no sigamos como güellas menadas por un pastor que nomás nos quiere cada 4 añadas y dimpués au. Como bien se dizió en a charrada d’ayere, cuan no bi ha berdaders argumens ta esfender una ideya como ista, se fan serbir iste lenguache perbertiu que fabla por nusatros con parolas como “tot siga por o progreso, perque o progreso ye o progreso” …
Expo Zaragoza 2008, l’expo de l’augua y d’o desembolique amparable. Mientras nusatros somos gastando millons d’euros estricallán l’Ebro, belatros se michan os morgallos. Tot siga por o progreso

A margaritona

2007-11-24T23:32:00.000+01:00

A margaritona (Margaritifera auricularia) ye un musclo bibalbo d’augua dulce de gran grandaria (dica 20 zm) que abita en os fundos d’os ríos y Canals con agundanzia de ragualla.
Antismás abondán y con ampla distribuzión en Europa, a modificazión d’as carauteristicas naturals d’os ríos ha estau a causa prenzipal d’a suya disparixión a gran escala.

DISTRIBUZIÓN
En a autualidat, a mayor poblazión conoxida mundialmén se troba en a Canal Imperial d’Aragón, con un numero superior a 4.000 exemplars. Se son trobadas bellas poblazións, encara que más chicotas, en a Canal de Taust (bel zentenar d’exemplars en o suyo trampo aragonés) y en o río Ebro de bels 200 exemplars y tamién en Franzia han escubriu una poblazión en o río Vienne y en a Charente, con no pas més de 100 exemplars. Amás en istos momens no se conoxen individuos chobens, estando toz os trobaus crexius.

PROTEUZIÓN
A margaritona ye enclusa en o Catalogo Nazional d’Espezies Menazadas y en o Catalogo d’Espezies Menazadas d’Aragón en a categoría “en periglo d’extinzión”.
En 2005 o Gubierno d’Aragón aprebó o plan de remontadura de Margaritifera auricularia en Aragón an que se defienen bella serie d’autuazions con l’ochetibo de guaranziar l’estacha d’os habitaz an que se troba en l’autualidat. Se fan rechiras ta conoixer, en detalle, o ciclo reprodutor d’a especie y d’os peixes aloxadors y tamién se preba de desembolicar teunicas que permitan a suya cría en cautibidat.

L'agüerro

2007-11-08T22:26:00.000+01:00

Ya fa bellas semanas que comenzipió a dixar-se sentir l'agüerro (cada añada o fa más tardi )
Ye agora, cuan as fuellas amariellas aplenan os camíns, cuan o zielo enmudexe y os fogarils se enzienden dixando por as carreras una ulor a zenisa y corduño que me fa remerar atros tiempos.

Asti baixo toz dixo bellas fotos que he feito (no pas totas son de yo)
Ya sé que no son guaire buenas, pero ta estar afizionau ya bi'n ha prou.
Si no tos cuaca mosica punchaz en o simbolito d'o altaboz. Ye que no sé que he feito que me ha saliu mosica sin querer! No sé si a busatros tos sale.

Que baiga bueno!

IV Chornadas d'amostranza ambiental d'a Unibersidat de Zaragoza. A proteuzión d'a biodibersidat

2007-10-29T14:57:00.000+01:00

Os pasaus diyas 25 y 26 d’octubre se zelebrón as cuartenas chornadas d’amostranza ambiental que l’Unibersidat de Zaragoza gosa fer sobre istas calendatas dende fa cuatro añadas, Con menos chen que no a que s’asperaba.
Tot comenzipió con o tipico discurso d’os organizadors y de atros personaches. Entre atros se asperaba a besita d’o consellero de meyo ambién d’o Gubierno d’Aragón, Alfredo Boné, pero ta la mia percutida en o suyo puesto aparixió o nuebo direutor cheneral de desembolique emparable y biodibersidat, Alberto Portero. (¡Con a ilusión que me ese feito de beyer-lo!...)
As chornadas continón con a primera ponenzia sobre a biodibersidat menazada, reyalizada por o profesor Joan Doménech Ros d’a Unibersidat de Barcelona que nos amostró qué yera a biodibersidat, como se creya y como se destruye, as relazións entre sers bibos, etc.
Dimpués Carmela García, Asesora de meyo ambién d’a Xunta de Galizia trató temas relazionaus con a proteuzión d’a biodibersidat y as balors que le’n da , con un discurso una mica filosofero y poco ameno ta o mío gusto.
Continando ya de tardis, Manuel Alcántara, chefe d’o serbizio d’espezies protexidas d’o Gubierno d’Aragón charró sobre os programas de conserbazión d’espezies en Aragón.
Y rematando o diya, cuan se entrefilaba que plegaba o millor ya que se iba a charrar d’espezies endemicas d’Aragón ( ¡¡Ai maño que m’emoziono!! ), bi aparixió un ombre granizo que nos charró de cómo pillaba chibosos y moscas con sofisticadas y maquiabelicas maquinas feitas por el mesmo con embases, botellas de plastico y con atros lequidos dibersos por os Monegros y cómo l’encorriban os lolos a cantazos. No ye que no me cuaque a entomolochía, si ye muito interesán saber que a os bichos les cuaca la biera y os mezclallos de matafaluá con binagre, pero yo asperaba que s’ese charrau más d’o resto d’espezies endémicas ( Puestar que m’ese cuacau que’esen charrau d’o Melanopsis penchinati, ixe musclo que només bibe en o lago d’o mío lugar, encara que nadie lo sepa. Ya en escribiré) Tamién cal dezir que iste “omenet” descubrió más de 200 nuebas espezies (d’inseutos, cómo no)
En o segundeno y zaguer diya se tratón os problemas meyo ambientals d’a nuestra unibersidat, con bels treballos feitos per alumnos d’os distintos campus y con una mesa redonda sobre os problemas que nusatros mesmos beyemos, beluns tan curiosos como a malfurriada d’augua d’o regano y d’os pixaderos ( si, Ixos tamién son problemas ambientals ) y tamién se proposón bellas autibidaz u soluzións como dixar a disposizión d’os alumnos as fuellas mal fotocopiadas en reprografía ta poder fer-las serbir ta pillar apuntes por una cara, fomentar l’emplego d’o ADD o meter cartels informatibos en os árbols d’os campus informando sobre os empliegos meyo ambientals d’ixa espezie y por o tanto a importanzia que tienen.)
A prosima zita ye o diya 15 de nobiembre a las 19:00 oras en o salón d’autos d’a facultad de machisterio. Se proyeutará o documental “Una berdat incomoda” que trata as consecuencias d’o cambeo climatico.

L'ameba mincha-celebros torna a l'enrestida.

2007-10-27T00:24:00.000+02:00

En leyendo ista notizia que m’amostró o mio amigo Javi, no podié endurar as ganas de fer-ne a riseta. Cómo no. Toz isto siempre acayece en os Estatos Chunitos, pensé.
Me fazió remerar ixa pelicula que me fazió asabela zerina de chicot , ixa d’os muertos bibiéns que saliban baixo a tierra y minchaban celebros como qui mincha una ralda de milón d’augua. Pero tamién me pregunté ¿Y si ye berdat?....Ai amigo, ixo sí que fa zerina! Güe te chitas ta la piscina u a o lago y maitín a tuya capeza pesa a metat ( a belún le’n caldría una mica )
Asti baixo tos dixo a notizia ta que la leigaz y ta que bi pensez.

"Alerta por nuebos casos de muerte por ameba que mincha celebros."

L’arlarma crexe en os Estatos Chunitos por l’incremento de muertes a causa d’un parasito microscopico clamau como Naeglesria fowleri que bibe en auguas continentals y calidas y que se fica en o cuerpo umán a trabiés d’a nariz ta destruyir as mucosas, plega en o zelebro an se sitia t’abalar as zelulas zelebrals d’as bitimas dica prebocar-les a muerte.
Iste parasito gosa trobar-se en ibóns, badinas, auguas industrials o piscinas escuidadas y con poco cloro.
Ista ameba ya ha matau ista añada a seis ninos y chóbens en Estatos Chunitos, a mayor cantidat de muertos por ista causa estió entre 1995 y 2004 cuan morión 23 presonas.
Debiu a o cambeo climatico, o numero d’infeutaus podría crexer ya que ista ameba bibe y se desembolica en a calor.

Sintomas

Os primers sintomas son dulors en a capeza, fiebre, rixidez en o cuello y mesmo enluzernadas o cambeos en o comportamién en casos más enantaus. En pasando una semana o pazién puede dentrar en coma y morir.
Dica iste momén no se conoixe garra tratamién eficaz y son pocas as posiblidaz que sobrebibir malas que comenzipia a infeuzión.

A foca monche

2007-10-17T00:10:00.000+02:00

O Menisterio de Meyo Ambién siñará o prosimo chuebes en Adeje (Tenerife) un alcuerdo con os Menisterios de Meyo ambién de Portugal, Marruecos y Mauritania, y o secretaire cheneral d’o combenio d’Espezies Migradoras Menazadas t’a conserbazión d’as poblazións de focas monche.
Seguntes ha informau güe o Menisterio de Meyo Ambién, l’alcuerdo ye o resultau de bellas añadas de treballo por parti d’o Menisterio de Meyo Ambién español, que endreza o plan d’aizión t’a remontadura d’a foca monche en l’Atlantico oriental, an l’estatus d’a espezie ye “mui cretico”
“L’ochetibo ye de contrebuyir a la conserbazión d’as poblazións d’a foca monche, uno d’os mamifers más menazaus d’o mundo, clasificau como “creticamén menazada” per a Chunión Mundial t’a Conserbazión d’a Natura (UICN)” siñala a nota.
A foca monche fegura en o Combenio d’Espezies Migradoras Menazadas o Combenio de Bonn, o que embreca establir alcuerdos de coperazión internacional, en os que España ha preniu una “posizión de liderazgo”.
Ista espezie d’extinguió en España a metat d’o sieglo pasau y se calcula que en quedan menos de 500 exemplars distribuyius entre o Mar Mediterranio (Grezie, Turquía, Marruecos y Archelia) y l’Atlantico oriental (Portugal, Marruecos y Mauritania)
Achenzia EFE

Tot muito poliu pero encara cal saber cuals son ixas midas que se ban a prener, con tot y con ixo negro esdebenidero le barrunto si se contina aplicando as mesmas leis de proteuzión que dica agora. Pero bueno, siempre quedarán notizias tan asperanzadoras y polidas como ista.

A brúa

2007-10-13T00:30:00.000+02:00

A brúa (Grus grus) tamién conoxida como gruga, gruda u brulla entre atros nombres con os que ista abe ye clamada, puestar que siga un d’os animals migradors más conoxius en as nuestras tierras
Ista escardalenca y garrilarga abe tien autualmén en Gallocanta a suya prenzipal estazión de paso y ibiernada.
A dentrada, con a cayida d’o sol, d’os embols de mils de brúas con ixe estrapaluzio que tanto les carauteriza, ent’os suyos leitos d’a lacuna ye, sin garra dandalo, uno d’os más percutidors espeutaculos que a fauna salbachina puede encara ufrir-nos en a industrializada Europa.
De tarabidau intresbatible, caminar pausau y elegán, iste animalet ha estau dende cutio almirado y as suyas migrazións obcheto d’estudeo relazionadas con situazións diversas en os países que trabiesa.

BIOLOCHÍA Y ETOLOCHÍA
O plumache d’una brúa crexida ye griso pizarroso eszeuto as plumas primarias y secundarias d’as alas que son negras u de color negra azulada. Parti d’istas secundarias y as cobertoras son muito largas cayindo por denzima d’a suya curta coda, zaboyando-la y fendo que ista pareixca que ye muito más gran que no o qu’en ye.
En beyer-la amán se beye un troz de pelello espullau de color roya biba en o pileo ( capeza ) O cuello ye negro en a suya parti superior, como a garganta, fren y foyeta, pero dend’os güellos bi ha unas amplas bandas blancas que se chunen en a parti zaguera d’o cuello.
O suyo pipón ye griso verdoso, royo en o cobaxo. As suyas garras son negras y l’iris d’os suyos güellos puede cambear d’o royo a l’amariello.
As brúas crexidas pueden plegar a os 115 zm de altaria y a suya embergadura ye de 200 zm. As chobens son de menor grandaria y tien a capeza de color castaña emplumada de raso, ye decir, sin ixa parti de pelello espullau royo en o pileo, con garganta grisa coda menos turionada y de garras marronas. En suzesibas mudas alquieren o plumache d’os crexius, en menos d’una añada.
No existe un dimorfismo sexual acusau, encara que podemos beyer una grandaria lixeramén menor en as fembras. Pero ye o suyo comportamiento o que más esferenzia a os dos sexos ya que as fembras cheneralmén permanixen más amán d’as crietas mientres que o masclo permaneix bichilán.
As brúas son sexualmén maduras a las 4 añadas alto u baxo.
A mesa d’os güegos acayece en mayo y estando istos cubaus por os dos proxenitors, naixen 1 u 2 criyetas a os 30 diyas. Istas chiquetas brúas son animalez asabelo estutos ya que en estando nidifugos a las 24 horas d’a suya naxenzia ya pueden correr ascape, a os 3 diyas ya piponian y beben augua y a las 10 semanas ya buelan.
Ye un animalet tutón que fuye en que siente bel periglo, corriendo bels metros per o solero con as alas ubiertas antis de comenzipiar o belo y ye también una d’as abes más ruidosas que existen.
Anda con o cuerpo orizontal y levando o cuello curbau. O suyo belo ye pando y as formazións en V d’os embols puestar que siga una d’as trazas más faziles de esferenziar a istas abes, chunto con o estrapaluzio que fan. A suya alimentación cambea seguntes sigan en o puesto de cría, an michan bulbos, trunfas, imbertebraus, anfibios, reptiles, u en o puesto de ibernazión, an michan billotas, zerials en cheneral como o panizo, roz, inbertebraus, etc.

HABITAT Y MIGRAZIÓNS
O habitat cambea seguntes as diferéns etapas d’a vida d’as brúas.
En a epoca d’a cría, as brúas eslixen puestos humidos como pozins con siscas u tamién claros entre o bosque. Cualsiquier puesto de difízil dentrada. En ista época as brúas que gosamos beyer en España se troban en países escandinavos.
En a epoca de discanso eslixen arias afogadas, tascals chanfuricosos
En a epoca de ibiernada (dende noviembre dica marzo) as brúas migran ent’a peninsula iberica dend’o Baltico a traviés de un estreito corredor de bels 250km de amplaria que traviesa Alemania, Olanda, Belchica, Franzia dica plegar en a peninsula iberica. En iste camino bi ha puestos an que as brúas aturan ta discansar como Camp de Captieux u l’ibon de Der-Chantecoq en Franzia ( ye refitolera a relazión entre iste nombre “Chantecoq” que significa “Cantagallo” con a versión aragonesa de Gallocanta, pero sabiendo que biene d’o zeltibero “allucant” nombre que tien relazión con a parola “cantal” y se suposa alabez que no tien garra relazión con os animals que bi’n ha)
Aquí as brúas eslixen puestos ubiertos como umedals, ye o exemplo de Gallocanta y también acampos como as de Extremadura.

PROTEUZIÓN
Ta la proteuzión d’ista abe se creyón bels proyeutos como o “Proyeuto Grus” promovido por a SEO y a Cordinadora ta l’esfensa d’as abes (CODA) con l’ochetibo de fer una prospeuzión d’os alazetals puestos d’ibiernada y o estudeo d’a migración d’a brúa común en a peninsula Iberica. Iste estudeo contrimostra que a Laguna de Gallocanta ye a prenzipal area en a migrazión postnupzial y prenupcial.
Tamién existe o proyeuto “Grulla” promobida por a ADENEX (Asoziazión ta l’esfensa d’a natura y os recursos en Extremadura) que preba de protexer l’habitat d’a brúa en istas tierras, os acampos y as carrascas.

16 de Septiembre. Diya internazional t'a proteuzión d'a capa d'ozón.

2007-09-16T23:54:00.000+02:00

Güe, diya 16 de septiembre ye o diya internazional d’a capa d’ozón, remerando asinas o diya an que as Nazións chunitas siñón o tratau de Montreal fa 20 añadas en iste mesmo diya.
Seguntes a OMM (Organizazión metereolochica mundial) fa una añada o forau sobre l’Antartida plegaba a os 28 millons de Km cuadraus, ye dezir, como 56 begadas a grandaria d’España. Ista añada seguntes nuebas alufradas d’a OMM a capa d’ozón ha plegau a la suya maxima superfizie y que irá achiquindo amonico en os proximos dezenios grazias a iste protocolo an que se miró d'achiquir u de redorar a presenzia de 90 produtos quimicos, como os archiconozius CFC's (Clorofluorocarbonaus) que se feban serbir en a refrixerazión u en equipes contrainzendios.

Istos produtos reyazionan con l'ozón destruyindo-lo.

Seguntes bels zentificos, a capa d'ozón "se arrepetazará de raso" en que remate o sieglo XXI.

En reyalidat, l’ozón ye un gas berenoso t’os sers bibos ya que causa daños como cremaduras, cánzers, cataratas, etc. Amás d’enfeblexer o sistema inmunolochico. Ye tamién un gas que causa o efeuto ibernadero. Pero l’ozón que se troba en a capa d'ozón (que ye una rechión d'a morfuga entre os 15 y 35km d'altaria an se'n concentra o 90%) ye asabelo esquimenizo ya que cola a radiazión ultrabioleta conoxida como UV-B, que ye o causán d’os daños antis nombraus

O jopillo

2007-09-12T16:34:00.000+02:00

Cuan se charra d’espezies menazadas toz pensamos en o tipico, o cunchigüesos, o linze, l’onso panda.... pero miraz-tos de fer una chicota listeta de espezies menazas que no sigan animals....¿no’n ye fázil, no?
Bi ha espezies bechetals que tamién perteneixen a las listas de espezies menazadas tanto en periglo d’estinzión como en sensible a l’alticamada d’o suyo habitat , nafrable u d’interés espezial.
En iste caso, se trata d’o jopillo, una espezie sensible a l’alticamada d’o suyo habitat, ye dezir, que a suya existenzia pende d’os cambeos en o suyo habitat ya que un pequeño cambeo puede fer disparixer toda una poblazión. Isto no quier dezir que bi’n aiga pocos. Puestar que una poblazión siga asabelo gran pero que como pende d’un minimo cambeo en o habitat, ista disapareixca ascape.

BIOLOCHÍA Y FENOLOCHÍA

O jopillo ye una planta rastrera de fuellas pequeñas oboideo-lanzeoladas y de flors rosadas, solencas en as asilas d’as fuellas, con un tubo floral urceolau (con forma de olla o de rezipién con forau estreito) y con doze nierbols. Parte d’os suyos tallos son en zig-zag.
Ye una espezie terofita, ye dezir, a planta només existe en a epoca faborable mientres que en a epoca desfaborable només quedan as suyas simiens.
A suya florazión ye de chulio ta agosto y a suya fructificazión ye dende agosto dica septiembre.

HABITAT

O jopillo ye una espezie endemica d’a peninsula iberica.
Amenista suleros atapiaus cheneralmen halofilos ( que contiengan sal ) y nitrofilos ( que contiengan nitrocheno )
En Aragón només se troba en a laguna de Gallocanta, en o naballo de Used y en as basas de Carrabejas de Torralba d’os Sisons. A una altaria de entre 900-1100 metros.

Ojalá pudiera borrarte - Maná

2007-08-31T22:37:00.000+02:00

O linze iberico

2007-08-26T14:20:00.000+02:00

O linze iberico ye un felín endemico d’a peninsula iberica que tien l’argüello d’estar o felín más menazau d’o mundo.
Abitó toda la peninsula iberica dend’os Perinés ( an se entrefila que podió abitar chunto a o linze euroasiatico ) dica Cadiz. Manimenos en o S. XX comenzipió una rapeda disparixión por causas antropolochicas ( tanto dreitas como indireutas ) As suyas poblazións son pequeñas y son isoladas.
A suya situazión tan cretica ha feito que se aigan preniu bellas midas de proteuzión muito drasticas tal como o perpago d’a construzión d’una autopista entre Toledo y Cordoba.

FESIONOMÍA Y FESIOLOCHÍA

Ye un felín d’aspeuto lambreño, con garras largas y una coda curta con un morrollo negro en a estrimera que gosa mantener quillau mobiendo-lo en momens de pegliro u azitanzia.
As suyas carauteristicas orellas punchigudas son rematadas en un pinzel de pels negros rixius. Tamién son carauteristicas as pulseras que penchan d’os suyos caxos y que aumentan de grandaria china chana con a edat.

A suya grandaria ye muito más chicota que no a d’o linze euroasiático. Carauterística que truxan cuasi toz os animals ibericos comparando-los con as espezies d’o norte d’Europa.
A suya epoca de climen ye entre marzo y abril
A suya chestazión dura bels dos meses naxiendo 1 u 2 mixíns
Son animals territorials, ye dezir, que amugan un territorio que les pertoca y dengún exemplar d’o mismo sexo puede bi estar.
O linze ye fértil dend’o primer ibierno encara que només puede copular en que poseye un territorio.
Bibe bellas 14 añadas.
Se alimenta alazetalmén de coniellos encara que de cabo ta cuan gosa cazar atros animals más que más en ibierno cuan no bi ha prou de coniellos.

HABITAT

O linze iberico se troba en bosques y matigueros mediterranios an troba cubillar y en feneros ubiertos an caza coniellos. Ye desasentau en puestos an no bi ha coniellos como cautibos o plantazions d’espezies esoticas como l’eucalipto.
En 2006 os unicos nuclios con presenzia segura d’a especie se limitan a Sierra Morena, mesmamén en os Parques Naturals de Sierra de Ándujar y Cardeña y Montoro, y o Parque nacional de Doñana y a suya redolada. También bi’n ha en as sierras de Toledo, o sur de Madrid y en o Algarbe en Portugal..

CAUSAS D’A SUYA DISAPARIXIÓN

A principal causa d’a suya disparixión ye a fuerte baxada d’a poblazión d’a suya alazetal fuen d’alimentazión, o coniello, debiu a l’introduzión de coniellos americans que lebaban con els a malotía d’a mixomatosis que en os años 50 fazió que o 80% morisen. Ista malotía cal chuntar-la con o NHV (neumonía hemorrágica vírica).

Atra d’as causas ye a manca de territorios ta que pueda lebar una vida seguntes a suya natura. A caza zinechética que muga grans terrenos, a construzión de carreteras ( cal parar cuenta as pilladas con os autos) Tot isto fa que as poblazións de linzes se isolen, que no tiengan contauto con atrás poblazións con a perda de dibersidat chenética que isto rebaila.

Os lazos y trampas de caza tamién son un gran problema ta iste felín.

MIDAS A PRENER

En 1999 se creyó a “Estrategia nacional para la conservación del lince ibérico en España” que ye enfocada en dos bías:

-Cría en cautibidat, que se reyaliza en o zoolochico de Xerez d’a muga.
-Restaurar y protexer l’habitat natural d’o linze. Prener midas ta que aumente a poblazión de coniellos salbachíns y reduzir l’isolamiento d’as poblazións.

Istas midas cambean adautando-se a las nezesidaz d’as diferéns poblazións.
En o Parque natural de Doñana entre atrás midas destacan istas:

-Chestazión zinechética alcorde a os intrés d’o linze, como achiquir a poblazión d’herbiboros que compiten en alimentazión con o coniello.
-Biedadura d’a caza de coniellos en os puestos an abiten linzes.
-Control d’atros predadors d’o coniello.

También se son creyaus bellas fundacions que menan proyeutos como o “Proyecto lince” que preba de amillorar a situazión d’o linze en a Sierra de Gata entre Cázeres y Salamanca chunto a la muga con Portugal.

Revolución

2007-08-17T13:58:00.002+02:00

O candrexo común de río

2007-08-12T01:12:00.000+02:00

Iste animalet ye un crustazio d’auguas continentals. O de mayor grandaria d’Europa. Yera muito común en Aragón ( y en toda España) dica finals d’os 70’ d’o pasau sieglo.
A suya rapeda disparixión penada dend’alabez ye debida a bels fautors d’orichen antropolochico.
En Aragón tien l’estatus de especie en periglo d’estinzión. ( Bi’n ha 4: periglo d’estinzión; sensible a l’alticamada d’o suyo habitat; nafrable y d’intrés especial. En una atra dentrada esplicaré as diferenzias entre un y unatro)

FESIONOMÍA Y FESIOLOCHÍA
- 11 zm de largaria y 80 gr. de peso
-Capeza muito ampla y anteras largas.
-Pinzas grans comparando-las con a grandaria d'o candrexo.
-Color marron-berda
-A suya copula acayece entre otubre-nobiembre y a misa de dica 160 güegos ,que la fembra alza baixo a suya pancha ( en os suyos pleopodos) , acayece a los 10-15 diyas produzindo-se a eclosión en primabera.
-Mincha matiera organica animal y bechetal d’o leito d’o río amás de macroimbertebraus y mesmo fizons de peixes y sagallóns d’anfibios.
Por o feito de michar a matiera organica se le clama o “baleyador d’o río” funzión asabelo importán en o ecosistema acuatico.
-Os chóbens penan bellas mudas en os primers meses d’a suya vida, y os crexius en penan bels 2 a l’añada.

HABITAT

-As suyas poblazions se mantienen soladas en os cobaltos d’os ríos de toda la peninsula encara que’n prefieran os d’o norte. Puestos d’auguas frescas, sin contaminazión y con matiera organica.

CAUSAS D’A SUYA DISPARIXIÓN

-Introduzión d’o candrexo royo americán (Procambarus clarkii) que amás d’o suyo foriconismo, iste lo esplaza ya que tien prauticamén o mesmo nicho ecolochico ( a mesma alimentación, mesmo puesto an bibir, etz)
-Acomananza d’a postema u la tamién clamada afanomicosis. Malotía producida por o fongo Aphanomyces astaci que estió ficau en a peninsula por o candrexo royo americán.
-Esferra d’o suyo habitat, contaminazión d’as auguas
-Pesca escesiba.

MIDAS A PRENER

Ta prebar de soluzionar os poblemas anteriors se han priso as siguiéns autuazións:

-Biedadura de treslau de candrexos aloctonos (no pas autoctonos) en bibo.
-Biedadura de cautura.
-Reproduzión en cautibidat.
-Reforzamién
-Proteuzión d’os ecosistemas flubials embrecaus.
-Control de bertius.

2007-08-05T23:04:00.000+02:00

Si tos pregunto que relazión bi ha entre istos exemplos de fauna y flora ibericas:

“linze, clunchigüesos, edelweis, onso”

De seguro que toz ez pensau o mesmo. Que son espezies menazadas u en periglo d’estinzión.
Pero si tos digo:

“tremonzillo sanchuanero, melanopsis penchinati, crujiente, aloda de Dupont”

Direz que nunca no los ebaz ascuitau. ¡mesmo belún no tien nombre común!
Pues istos cuatro zaguers nombres caldría ficar-los tamién en a mesma lista que os primeros ya que, encara que cuasi denguno no los conoxca, son tamién espezies catalogadas como menazadas u en periglo d’estinzión.

En a nuestra cheografía iberica bi ha asabelas espezies esconoxidas que son en a mesma situazión. Asinas que aprobeitaré ta comenzipiar iste blog escribindo un poquet sobre istas espezies, más que más comentando o suyo estau en a nuestra tierra, Aragón, ya que seguntes sigamos en una comunidat u un atra, as espezies, as suyas poblazións y distribuzión, desembolique, y mesmo as suyas leis de proteuzión u aprobeitamiento cambean.

Un nuebo blog

2007-08-02T20:51:00.000+02:00

Güe, 2 d’agosto, plega de naixer iste nuebo blog. Un blog an se ba a charrar de meyo ambién, natura, zienzia, Aragón, istoria u cualsiquier tema que pareixca interesán.
Pareix que fer un blog ye de moda, que toz en tienen uno, manimenos ye un treballo fainero an que bella begada cal estar muito tiempo debán l’ordenador.
Asinas que aspero que tos faiga goyo y si querez fer bel comentario, fez-lo que a yo tamién me ferá goyo de leyer-los.
Tamién quiero dar grazias a chen como Santi qui me ha aduyau ( y aspero que me aduye encara más ) y a Javi qui me ye amostrando como fer serbir o blog ( yo encara no se fer-lo guaire bien )

Alberto